O‘zbekistonda 220 ming xonadonning gaz ta’minoti yaxshilanadi

Prezident Shavkat Mirziyoyev neft-gaz tarmog‘ida 2026–2027-yillar kuz-qish mavsumiga tayyorgarlik ishlari yuzasidan axborot bilan tanishdi.

 

Taqdimotda aholi, ijtimoiy soha obyektlari va iqtisodiyot tarmoqlarini energiya resurslari bilan barqaror ta’minlash bo‘yicha ishlab chiqilgan kompleks chora-tadbirlar ko‘rib chiqildi. Unda tabiiy va suyultirilgan gaz yetkazib berish, magistral va hududiy gaz tarmoqlarini ta’mirlash, yoqilg‘i zaxiralarini shakllantirish hamda avariya-tiklash brigadalarining shayligini ta’minlash masalalari muhokama qilindi.

 

Ma’lum qilinishicha, kuz-qish mavsumigacha magistral gaz quvurlarining 53,7 kilometr nuqsonli qismi almashtiriladi, kompressor stansiyalaridagi 77 ta gaz haydash agregati mukammal ta’mirlanadi.

 

Shuningdek, 881 ta mahalladagi 220 ming xonadonda gaz ta’minotini yaxshilash maqsadida uch bosqichli gaz taqsimlash tizimi ikki bosqichli tizimga o‘tkaziladi. 711,9 kilometr gaz tarmog‘i hamda 400 ta gaz taqsimlash punkti rekonstruksiya va mukammal ta’mirdan chiqariladi.

 

Kuz-qish mavsumida aholiga 325,7 ming tonna suyultirilgan gaz yetkazib berish rejalashtirilgan. Jumladan, borish qiyin bo‘lgan 229 ta qishloqdagi 104,7 ming iste’molchiga 8,2 ming tonna suyultirilgan gaz yetkazilishi belgilangan.

 

Qish mavsumi uchun yoqilg‘i zaxiralari ham shakllantirilmoqda. Rejalarga ko‘ra, dekabr–yanvar oylari uchun 120 ming tonna avtobenzin zaxirasi yaratiladi, issiqlik elektr stansiyalariga esa mavsum davomida 4 million 161 ming tonna ko‘mir yetkazib beriladi.

 

Bundan tashqari, “O‘zbekneftgaz” tizimidagi korxonalarda 90 ta texnologik qurilmada ta’mirlash ishlari amalga oshiriladi. Bu ishlab chiqarish quvvatlarining uzluksiz ishlashi va energiya resurslarini barqaror yetkazib berishni ta’minlashga xizmat qilishi qayd etildi.

 

Prezident tayyorgarlik ishlari neft-gaz tarmog‘i bilan cheklanmay, energetika va kommunal sohalar bilan uzviy bog‘liq holda olib borilishi zarurligini ta’kidladi. Shu munosabat bilan respublika va hududiy komissiyalar faoliyatini muvofiqlashtirish, belgilangan chora-tadbirlar ijrosini qat’iy nazorat qilish hamda kuz-qish mavsumiga tayyorgarlikni o‘z vaqtida yakunlash bo‘yicha mas’ullarga tegishli topshiriqlar berildi.