Qirgʻizistonda ayollarni oʻldirganlik uchun umrbod qamoq jazosi joriy etilishi mumkin
Qonun loyihasi ayollar hayotini huquqiy himoya qilishni kuchaytirishga qaratilgan.
Qirgʻiziston parlamenti deputati Burul Amanova mamlakat Jinoyat kodeksiga "femitsid" tushunchasini kiritish hamda ushbu turdagi jinoyatlar uchun eng ogʻir jazoni belgilashni nazarda tutuvchi qonun loyihasini jamoatchilik muhokamasiga taqdim etdi. Bu haqda 24.kg xabar berdi.
Loyihaga koʻra, femitsid ayolning jinsiga nisbatan nafrat yoki kamsitish asosida, zoʻrlash bilan bogʻliq holda, homilador ayolni qasddan oʻldirish yoki ayolni oʻz joniga qasd qilishga majbur etish oqibatida sodir etilgan oʻlim holatlarini qamrab oladi.
Qonun loyihasida bunday jinoyatlarni sodir etgan shaxslarga umrbod ozodlikdan mahrum qilish, mol-mulkini musodara qilish hamda ularga nisbatan amnistiya qoʻllamaslik taklif etilgan.
Burul Amanovaning taʼkidlashicha, qonun loyihasi feminizm yoki feministik harakatni qoʻllab-quvvatlash bilan bogʻliq emas. Uning asosiy maqsadi ayollar hayotini huquqiy jihatdan yanada kuchliroq himoya qilish va ayollarga nisbatan sodir etilgan qotilliklarni alohida jinoyat turi sifatida belgilashdan iborat.
Qonun loyihasiga ilova qilingan izohda Qirgʻiziston Bosh prokuraturasi maʼlumotlariga tayanilib, mamlakatda ayollarga qarshi sodir etilayotgan jinoyatlar soni yildan yilga ortib borayotgani qayd etilgan.
Shuningdek, Ayollar, tinchlik va xavfsizlik (WPS) indeksi natijalariga koʻra, Qirgʻiziston 2021 va 2023-yillarda Markaziy Osiyoda ayollar uchun eng xavfli mamlakat sifatida baholangan.
