Toshkentda kanalizatsiya suvi Salor kanaliga oqizilgan
Kanal suvidan belgilangan tartibda namunalar olinib, laboratoriya tahliliga yuborilgan.
Toshkent shahrining Shota Rustaveli ko‘chasida olib borilgan qurilish ishlari vaqtida shikastlangan kanalizatsiya quvuridan chiqqan oqova suv Salor kanaliga oqizilgani aniqlandi.
Toshkent shahar Ekologiya va iqlim o‘zgarishi bosh boshqarmasi ma’lum qilishicha, holat yuzasidan boshqarma rahbari, laboratoriya mutaxassislari hamda Yakkasaroy tumani ekologiya nazorati inspeksiyasi davlat inspektorlari ishtirokida tezkor ishchi guruh tuzilib, voqea joyida o‘rganish ishlari olib borilgan.
O‘rganish davomida oqova suvning Salor kanaliga to‘g‘ridan to‘g‘ri oqizilgani tasdiqlangan. Shundan so‘ng kanal suvidan belgilangan tartibda namunalar olinib, laboratoriya tahliliga yuborilgan.
Qayd etilishicha, tahlil natijalari hamda o‘rganish yakunlariga ko‘ra, atrof-muhitni muhofaza qilish talablariga rioya etilmagani yuzasidan qonunchilikda belgilangan tartibda tegishli choralar ko‘riladi. Qo‘shimcha ma’lumotlar tekshiruv ishlari yakunlangach e’lon qilinadi.
Eslatib o‘tamiz, 3-iyul kuni Yakkasaroy tumanidagi qurilish obyektida yuzaga kelgan texnik nosozlik oqibatida diametri 1 800 millimetr bo‘lgan kanalizatsiya quvuriga shikast yetgan edi.
