Farg‘onada shag‘al uyumiga yashirilgan qariyb 6 kg gashish aniqlandi
Muqaddam giyohvandlik bilan bog‘liq jinoyati uchun sudlangan ayol yana noqonuniy faoliyat bilan shug‘ullangani aniqlandi.
Davlat xavfsizlik xizmatining Farg‘ona viloyati bo‘yicha boshqarmasi, viloyat Ichki ishlar va Bojxona boshqarmalari xodimlari hamkorligida o‘tkazilgan tezkor tadbir davomida Farg‘ona shahri Beshbola mahallasida yashovchi, 1982-yilda tug‘ilgan ayol kelgusida sotish maqsadida 5 kilogramm 936 gramm “gashish” giyohvandlik vositasini mayda shag‘al uyumi orasiga yashirib qo‘ygani aniqlandi.
Tezkor tadbir davomida mazkur giyohvandlik vositasi ashyoviy dalil sifatida rasmiy tartibda musodara qilingan.
Ma’lum qilinishicha, gumonlanuvchi ayol avval ham giyohvandlik vositalari bilan bog‘liq jinoyati uchun sudlangan bo‘lishiga qaramay, yana noqonuniy faoliyat bilan shug‘ullangani aniqlangan.
Mazkur holat yuzasidan unga nisbatan Jinoyat kodeksining 25, 273-moddasi 5-qismi “a” bandi bilan jinoyat ishi qo‘zg‘atilgan. Hozirda tergov harakatlari davom ettirilmoqda hamda uning ehtimoliy sheriklarini aniqlash bo‘yicha tezkor-surishtiruv ishlari olib borilmoqda.
