I Xalqaro islom sivilizatsiyasi forumida Prezident murojaati o‘qib eshittirildi

 

Toshkent shahrida “I Xalqaro islom sivilizatsiyasi forumi: Tinchlik, bag‘rikenglik va ilm-ma’rifat yo‘li” mavzusidagi xalqaro forum o‘z ishini boshladi.

 

Forumda O‘zbekiston Respublikasi Prezidenti Shavkat Mirziyoyevning forum ishtirokchilariga yo‘llagan murojaati Prezident maslahatchisi Xayriddin Sultonov tomonidan o‘qib eshittirildi.

 

Forumda so‘zga chiqqan O‘zbekistondagi Islom sivilizatsiyasi markazi direktori Firdavs Abduxoliqov Prezident murojaatining mazmun-mohiyatiga to‘xtalar ekan, unda ilgari surilgan tashabbuslar Markaz faoliyatini yangi bosqichga olib chiqishini ta’kidladi.

 

Uning qayd etishicha, davlat rahbari murojaatida Qur’oni karimdagi “Iqro!” (“O‘qi!”) oyatining bugungi kunda ham o‘z dolzarbligini yo‘qotmaganiga alohida urg‘u berilgan. Mazkur da’vat ilm-fan, ma’rifat, tinchlik va taraqqiyot yo‘lida xizmat qilayotgan barcha insonlar uchun yo‘lchi yulduz bo‘lib qolayotgani ta’kidlangan.

 

Shuningdek, murojaatda aynan shu muborak kalom O‘zbekistondagi Islom sivilizatsiyasi markazi bosh peshtoqiga bitilgani, u markazning asosiy maqsadi — islom sivilizatsiyasining bebaho merosini asrab-avaylash, chuqur o‘rganish va shu asosda dunyo xalqlari o‘rtasida do‘stlik hamda hamkorlikni mustahkamlashdek ulug‘ vazifani ifodalashi qayd etilgan.

 

Prezident Shavkat Mirziyoyev Islom sivilizatsiyasi markazini xalqimizning tarixiy xotirasi, buyuk ajdodlar merosiga bo‘lgan chuqur hurmat ramzi va ayni paytda Yangi O‘zbekistonning kelajakka qaratilgan shiddatli intilishining yorqin timsoli sifatida baholadi.

 

Bundan tashqari, davlat rahbari Markaz ochiq intellektual maydon bo‘lib, dunyoning turli mamlakatlaridan olimlar, tadqiqotchilar, diniy arboblar va mutaxassislarni birlashtirish, fundamental ilmiy tadqiqotlar olib borish, qo‘shma loyihalar va ta’lim dasturlarini amalga oshirish uchun muhim platformaga aylanganini ta’kidladi.

 

Firdavs Abduxoliqovning so‘zlariga ko‘ra, Prezidentning Islom sivilizatsiyasi markazi qisqa vaqt ichida o‘tmish bilan kelajakni, Sharq bilan G‘arbni, qadimiy an’analar bilan zamonaviy ilm-fan yutuqlarini bog‘lovchi intellektual ko‘prikka aylangani haqidagi e’tirofi markaz jamoasi zimmasiga yanada katta mas’uliyat yuklaydi.