Navoiyda noqonuniy oltin qaziyotgan 3 fuqaro tuproq ostida qolib ketdi
Hodisa Xatirchi tumanidagi tog‘ hududida noqonuniy qazilgan chuqurlikda sodir bo‘lgan.
Navoiy viloyatida noqonuniy oltin qazish maqsadida qazilgan chuqurlikda tuproq ostida qolib ketgan uch nafar fuqaro qutqarib olindi.
Favqulodda vaziyatlar vazirligi ma’lum qilishicha, hodisa 7-iyul kuni soat 04:22 atrofida Xatirchi tumani “Angidon” mahallasi, Quvray qishlog‘i tog‘ hududida sodir bo‘lgan.
Dastlabki ma’lumotlarga ko‘ra, to‘rt nafar fuqaro noqonuniy ravishda oltin qazib olish maqsadida kon hududiga borgan. Ularning uch nafari noqonuniy qazilgan chuqurlikka tushib ketib, tuproq ostida qolgan.
Hodisa vaqtida tashqarida qolgan to‘rtinchi fuqaro zudlik bilan atrofdagilar hamda Navoiy viloyati Favqulodda vaziyatlar boshqarmasiga xabar bergan.
Qutqaruvchilar voqea joyiga yetib kelguniga qadar mahalliy aholi va hodisa haqida xabar bergan fuqaro chuqurlikdan bir nafar jabrlanuvchini chiqarishga muvaffaq bo‘lgan.
Shundan so‘ng FVB qutqaruvchilari voqea joyiga tezkor yetib kelib, tuproq ostida qolgan yana ikki nafar fuqaroni qutqarib olgan.
Qutqarilgan fuqarolarga zarur tibbiy yordam ko‘rsatilib, davolanish uchun tegishli tibbiyot muassasasiga yuborilgan.
Hodisa yuzasidan vakolatli idoralar tomonidan surishtiruv ishlari olib borilmoqda.
