Sirdaryo IES mutaxassisi Xitoydagi xalqaro tanlovda 2-o‘rinni egalladi

2026-yil 30-iyun – 4-iyul kunlari Xitoy Xalq Respublikasining Guanchjou shahrida Osiyo mamlakatlari hamda Shanxay hamkorlik tashkiloti (SHHT)ga a’zo davlatlar energetika sohasi mutaxassislari o‘rtasida xalqaro kasbiy mahorat tanlovi bo‘lib o‘tdi.

 

 

Mazkur nufuzli musobaqada “Issiqlik elektr stansiyalari” AJ Sirdaryo IES filiali elektr sexi boshlig‘i o‘rinbosari G‘ofur Xolnazarov muvaffaqiyatli ishtirok etib, 24 nafar ishtirokchi orasida faxrli 2-o‘rinni egalladi.

 

G‘ofur Xolnazarov “110 kV yuqori kuchlanishli kabel liniyalarida sinov ishlari va kabel muftalarini montaj qilish” yo‘nalishida o‘z bilim va amaliy ko‘nikmalarini namoyish etdi. 

 

 

Tanlov davomida ishtirokchilarning kabel liniyalaridagi nosozliklarni aniqlash, kabel parametrlarini belgilash hamda yuqori kuchlanishli kabel muftalarini montaj qilish bo‘yicha amaliy mahorati, shuningdek, mehnat muhofazasi va texnika xavfsizligi talablariga rioya etish darajasi baholandi.

 

 

Musobaqa Osiyo davlatlari mutaxassislari o‘rtasida ilg‘or tajriba almashish, zamonaviy texnologiyalarni o‘zlashtirish va energetika sohasidagi xalqaro hamkorlikni yanada rivojlantirish maqsadida tashkil etildi.

 

 

Yakuniy natijalarga ko‘ra, 1-o‘rin Xitoy Xalq Respublikasi vakiliga nasib etgan bo‘lsa, 2-o‘rinni O‘zbekiston vakili – Sirdaryo IES mutaxassisi G‘ofur Xolnazarov qo‘lga kiritdi.

 

“Xalqaro tanlovda erishgan natijam mamlakatimiz energetika sohasi mutaxassislarining kasbiy salohiyati yuksak ekanini yana bir bor tasdiqladi. Bu tajriba kelgusida elektr tarmoqlarining ishonchliligini oshirish va ilg‘or amaliyotlarni ishlab chiqarishga tatbiq etishda muhim ahamiyat kasb etadi”, – deydi G‘ofur Xolnazarov.