Toshkentda qizning behayo suratlarini tarqatish bilan tahdid qilgan yigit ushlandi
Instagram orqali tanishgan yigit jiddiy munosabat va’dasi bilan qizdan shaxsiy foto va videolarini olgan.
Ichki ishlar vazirligi Tezkor-qidiruv departamentiga kelib tushgan murojaat asosida voyaga yetmagan qizga nisbatan sodir etilgan tovlamachilik holatiga chek qo‘yildi.
Ichki ishlar vazirligi ma'lum qilishicha, 2008-yilda Toshkent shahrida tug‘ilgan qiz Instagram ijtimoiy tarmog‘i orqali bir yigit bilan tanishgan. Muloqot davomida yigit jiddiy niyatda ekanini bildirib, qizdan har xil behayo rasm-videolarni yuborishni so‘ragan.
Oradan vaqt o‘tgach, u ushbu materiallarni internet va ijtimoiy tarmoqlarda tarqatib yuborish bilan tahdid qilib, qizdan 300 AQSH dollari talab qilgan.
Ichki ishlar vazirligi Tezkor-qidiruv departamenti hamda uning hududiy bo‘linmalari tomonidan Sergeli tumanida o‘tkazilgan tezkor tadbir davomida gumonlanuvchi talab qilgan pullarning 200 AQSH dollarini olayotgan vaqtida ashyoviy dalillar bilan qo‘lga olindi.
Mazkur holat yuzasidan gumonlanuvchiga nisbatan Jinoyat kodeksining 165-moddasi birinchi qismi bilan jinoyat ishi qo‘zg‘atilib, tergov harakatlari olib borilmoqda.
