BMT O‘zbekistonni suv sohasidagi eng ilg‘or uch davlat qatoriga kiritdi

 

Ayni kunlarda New York shahrida Birlashgan Millatlar Tashkilotining Barqaror rivojlanish maqsadlari bo‘yicha yuqori darajadagi siyosiy forumi bo‘lib o‘tmoqda. Unda O‘zbekistonning suv resurslarini boshqarish va ichimlik suvi ta’minoti sohasida so‘nggi yillarda erishgan natijalari xalqaro hamjamiyatga taqdim etildi.

 

Forum doirasida O‘zbekiston Prezidenti Administratsiyasi rahbari o‘rinbosari Timur Butunbayev mamlakatda Barqaror rivojlanishning 6-maqsadi — “Toza suv va sanitariya” yo‘nalishida amalga oshirilgan islohotlar hamda ularning amaliy natijalari yuzasidan ma’ruza qildi.

 

Ma’lum qilinishicha, UN-Water baholashiga ko‘ra, 2026-yilda O‘zbekiston mazkur yo‘nalishda sezilarli taraqqiyotga erishgan dunyodagi uchta davlatdan biri sifatida e’tirof etildi. Ushbu ro‘yxatdan, shuningdek, Xitoy va San-Tome va Prinsipi ham o‘rin oldi.

 

Qayd etilishicha, so‘nggi yillarda mamlakatda suv xo‘jaligini modernizatsiya qilish, sohani raqamlashtirish, suvni tejovchi texnologiyalarni keng joriy etish, aholini sifatli ichimlik suvi bilan ta’minlash hamda suv resurslarini samarali va barqaror boshqarish bo‘yicha keng ko‘lamli islohotlar amalga oshirildi.

 

Natijada O‘zbekistonda suv stressi ko‘rsatkichi 2017-yildagi 169 foizdan 2022-yilda 122 foizgacha kamayib, 47 foiz bandga pasaydi.

 

Forum ishtirokchilariga, shuningdek, O‘zbekistonning suv sohasidagi institutsional va huquqiy islohotlari, mintaqaviy suv diplomatiyasi hamda transchegaraviy suv resurslarini samarali boshqarishga qaratilgan tashabbuslari haqida ham batafsil ma’lumot berildi.

 

Mazkur e’tirof O‘zbekistonda suv xavfsizligini mustahkamlash, suv resurslaridan oqilona foydalanish va ularni barqaror boshqarish borasida amalga oshirilayotgan islohotlar xalqaro miqyosda ham yuqori baholanayotganining navbatdagi tasdig‘i bo‘ldi.