Buxoroda universitetga tegishli 5 ta mashina xatlandi
Maʼlum bo‘lishicha, MIB orqali ishga tiklangan xodimga maʼmuriyat maosh to‘lashni xohlamagan.
Fuqarolik ishlari bo‘yicha Navoiy viloyat sudining ijro varaqalariga ko‘ra, undiruvchi D.K.ni ishga tiklash, 139.423.357 so‘m ish haqi va 6.000.000 so‘m maʼnaviy zarar undirish belgilangan.
Ijro hujjatlari Majburiy ijro byurosining Buxoro shahar bo‘limi ish yurituviga kelib tushgan va ijro ishi yuritishni qo‘zg‘atish to‘g‘risida qarorlar qabul qilinib, darhol ijro harakatlariga kirishilgan.Ijro harakatlari davomida sobiq xodim ijro hujjatida belgilangan tartibda Buxoro shahridagi taniqli universitetga tyutor vazifasiga ishga tiklangan.Biroq, sobiq xodim foydasiga ish haqi va maʼnaviy zarar undirish to‘g‘risidagi ijro hujjati ijrosi paysalga solingan.Shundan so‘ng, majburiy ijro harakatlariga kirishilib, universitet hisob raqamiga band solinib, mol-mulklarga va avtotransport vositalariga taqiq o‘rnatilgan.
Shuningdek, ijro harakatlari davomida avtotransport vositalariga qidiruv eʼlon qilinib, universitetga tegishli 5 ta avtomashina vaqtincha saqlash uchun jarima maydonchasiga joylashtirilgan.
Shundan keyingina qarzdor universitet sud qarorini bajarishga majbur bo‘lib, ijro hujjatida belgilangan ish haqi va maʼnaviy zarar pullarni to‘liq to‘lab bergan va ijro hujjati amalda tamomlangan.
