I Xalqaro islom sivilizatsiyasi forumi yakunida Deklaratsiya qabul qilindi

 

Toshkent shahrida o‘tkazilgan “I Xalqaro islom sivilizatsiyasi forumi: Tinchlik, bag‘rikenglik va ilm-ma’rifat yo‘li” yakunida forum ishtirokchilari Deklaratsiyani qabul qildi.

 

Hujjatda islom sivilizatsiyasining boy ilmiy va madaniy merosini asrash, chuqur o‘rganish hamda uni xalqaro miqyosda keng targ‘ib etishga qaratilgan qator muhim global tashabbuslar ilgari surildi.

 

Xususan, Deklaratsiyada O‘zbekistondagi Islom sivilizatsiyasi markazi huzurida xalqaro tashkilotlar, akademik va ilmiy muassasalar, muzeylar, kutubxonalar, arxivlar, qo‘lyozmalar markazlari, tadqiqot institutlari hamda boshqa manfaatdor tuzilmalarni birlashtiruvchi Jahon islom sivilizatsiyasi alyansini tashkil etish taklif qilindi.

 

Shuningdek, islom sivilizatsiyasi merosiga oid tarixiy manbalarni yagona platformada jamlaydigan Islom sivilizatsiyasi merosining jahon raqamli reyestrini yaratish, “Islom sivilizatsiyasi — butun insoniyat merosi” xalqaro dasturini amalga oshirish, Xalqaro islom sivilizatsiyasi mukofotini ta’sis etish, Jahon raqamli kutubxonasini shakllantirish hamda Islom sivilizatsiyasi bo‘yicha xalqaro yoshlar forumini muntazam o‘tkazish tashabbuslari ilgari surildi.

 

Qayd etilishicha, mazkur tashabbuslar islom sivilizatsiyasining insonparvarlik, ma’rifat va bag‘rikenglikka asoslangan bebaho merosini asrash, ilmiy jihatdan tadqiq etish va keng jamoatchilikka yetkazishga xizmat qiladi.

 

Ta’kidlanishicha, O‘zbekistonda Islom sivilizatsiyasi markazining tashkil etilishi hamda I Xalqaro islom sivilizatsiyasi forumining o‘tkazilishi islom sivilizatsiyasi merosini o‘rganish, asrash va ommalashtirish yo‘nalishidagi xalqaro hamkorlikni yangi bosqichga olib chiqadigan muhim qadam bo‘ldi.