“Qo‘qon holvasi” geografik ko‘rsatkich sifatida davlat ro‘yxatidan o‘tkazildi
Ro‘yxatdan o‘tkazish holvaning o‘ziga xosligi va sifatini saqlash hamda milliy brend sifatida rivojlantirishga xizmat qiladi.
Farg‘ona viloyatining milliy shirinliklaridan biri bo‘lgan “Qo‘qon holvasi” geografik ko‘rsatkich sifatida davlat ro‘yxatidan o‘tkazildi.
Adliya vazirligining ma'lum qilishicha, tarixiy manbalarga ko‘ra, Qo‘qon shahri qadimdan hunarmandchilik va milliy qandolatchilik rivojlangan maskanlardan biri bo‘lib, aynan shu hududda tayyorlanadigan Qo‘qon holvasi o‘zining an’anaviy retsepti, tayyorlash texnologiyasi, ta’mi va sifati bilan nafaqat O‘zbekistonda, balki xorijda ham e’tirof etilgan.
Mahsulotning geografik ko‘rsatkich sifatida davlat ro‘yxatidan o‘tkazilishi uning nomi hamda an’anaviy tayyorlash usulining huquqiy himoyasini ta’minlaydi. Shuningdek, bu mahsulotning o‘ziga xos xususiyatlari va sifat standartlarini saqlash, qalbakilashtirishning oldini olish hamda iste’molchilar ishonchini mustahkamlashga xizmat qiladi.
Mutaxassislarning ta’kidlashicha, ushbu ro‘yxatdan o‘tkazish Farg‘ona viloyatining gastronomik merosini asrash, hududning milliy brendini rivojlantirish va uni xalqaro miqyosda keng targ‘ib etishda muhim qadam hisoblanadi.
Ma’lumot uchun, geografik ko‘rsatkich — mahsulotning muayyan hududga mansubligi hamda uning sifati, obro‘si va o‘ziga xos xususiyatlari aynan o‘sha hududning tabiiy-iqlimiy va ijtimoiy-madaniy omillari bilan chambarchas bog‘liqligini tasdiqlovchi intellektual mulk obyekti sanaladi.
