Qoraqalpog‘istonda soliq qarzlari majburiy undirilmoqda
Birgina Qonliko‘l tumanida joriy yilning o‘tgan davrida soliq qarzdorligini undirishga oid jami 17 mlrd 766 mln so‘mlik 487 ta ijro hujjatlarining ijrosi taʼminlangan.
Majburiy ijro byurosi Qonliko‘l tuman bo‘limlari tomonidan soliq qarzdorliklarini undirish borasida bir qator ishlar amalga oshirilmoqda.
Xususan, bo‘lim tomonidan tuman soliq inspeksiyasi bilan hamkorlikda ishchi-guruhlar tuzilgan bo‘lib, ular jismoniy va yuridik shaxslarning soliq qarzdorliklarini undirish, shu orqali davlat byudjetiga pul yo‘naltirish ishlarini asosiy vazifa qilib qo‘yishgan.
Tahlillarga ko‘ra, joriy yilning o‘tgan davrida, soliq qarzdorligini undirishga oid jami 17 mlrd 766 mln so‘mlik 487 ta ijro hujjatlarining ijrosi taʼminlanib, shundan amalda 6 mlrd 431 mln so‘m undirilgan.
Qoldiqda bo‘lgan 14 mlrd so‘mlik 610 ta ijro hujjatlari ijrosini taʼminlash maqsadida undiruv qarzdorlarning mol-mulklariga va ish haqlariga qaratilmoqda.
Masalan, bo‘lim ish yurituvidagi qarzdor "AGROHAMKOR CLUSTER" MCHJning 1 mlrd so‘mdan ortiq soliq qarzi bo‘yicha unga tegishli barcha ko‘chmas mulklar tegishli tartibda xatlovga olingan.
Qarzdorlarga yuzaga kelgan soliq qarzi bartaraf etilmasa, xatlangan mulklar auksion savdosiga chiqarilishi haqida ogohlantirishlar berilgan.
