Toshkentda transmilliy kiberfiribgarlik bilan shug‘ullangan guruh qo‘lga olindi

 

Respublika bo‘ylab o‘tkazilayotgan “Xavfsiz va sog‘lom yurt” keng qamrovli tezkor-profilaktik tadbirlari doirasida Ichki ishlar vazirligi Kiberjinoyatlarga qarshi kurashish departamenti hamda Davlat xavfsizlik xizmati tomonidan transmilliy kiberfiribgarlik bilan shug‘ullangan yirik jinoiy tarmoq faoliyatiga chek qo‘yildi. Bu haqda Ichki ishlar vazirligi ma'lum qildi.

 

Dastlabki ma’lumotlarga ko‘ra, jinoiy guruh a’zolari Kanada, Buyuk Britaniya, Germaniya, Norvegiya, Niderlandiya, Daniya va boshqa davlatlar fuqarolarini yuqori daromadli investitsiya hamda kriptoaktiv loyihalari bahonasida aldab, ularning mablag‘larini noqonuniy o‘zlashtirish bilan shug‘ullanib kelgan.

 

Aniqlanishicha, ushbu faoliyatga chet tillarini mukammal biladigan yoshlar, jumladan, oliy ta’lim muassasalari talabalari ham jalb etilgan. Ular soxta telefon raqamlari orqali xorij fuqarolariga muntazam qo‘ng‘iroqlar qilib, o‘zlarini treyder yoki investitsiya maslahatchisi sifatida tanishtirib, fishing havolalar yordamida fuqarolarni kriptoaktivlarga sarmoya kiritishga undagan.

 

Tezkor tadbirlar davomida Toshkent shahrida faoliyat yuritgan ikkita yirik call-markaz fosh etilgan.

 

Yashnobod tumanidagi biznes markazlaridan birining oltinchi qavatida joylashgan kol-markazda 97 nafar shaxs aniqlangan bo‘lib, ulardan 5 nafari chet el fuqarolari ekani ma’lum bo‘lgan.

 

Shuningdek, Yakkasaroy tumanidagi biznes markazining 11-qavatida joylashgan yana bir call-markazda 34 nafar shaxs faoliyat olib borgani, ularning 3 nafari xorij fuqarolari ekani aniqlangan.

 

Tergov ma’lumotlariga ko‘ra, jinoiy guruh qat’iy konspiratsiya qoidalari asosida faoliyat yuritgan. Xodimlar maxsus o‘qitilgan, xorijlik fuqarolar bilan taxalluslar orqali muloqot qilgan. Binolarga kirish qat’iy nazorat ostida bo‘lib, maxsus qo‘riqlash tizimi yo‘lga qo‘yilgan.

 

Tezkor tadbirlar davomida kol-markazlarda jinoiy faoliyatda foydalanilgan:

• 136 ta kompyuter;

• 90 ta monitor;

• 73 ta protsessor;

• 53 ta monoblok;

• 320 ta telefon apparati;

• 128 ta qattiq disk;

• 175 ta xotira qurilmasi;

• 2 ta seyf hamda boshqa texnik vositalar ashyoviy dalil sifatida rasmiylashtirib olingan.

 

Mazkur holat yuzasidan Ichki ishlar vazirligi Kiberjinoyatlarga qarshi kurashish departamenti Tergov boshqarmasi tomonidan jinoyat ishi qo‘zg‘atilib, dastlabki tergov harakatlari davom ettirilmoqda.