Toshkentdagi YTH: ikkiga bo‘linib ketgan Lacetti’da ikki kishi halok bo‘ldi
Voyaga yetmagan haydovchi boshqargan Kia K5 bilan to‘qnashgan Lacetti ikkiga bo‘linib ketgan edi.
Toshkent shahrining Yunusobod tumanida sodir bo‘lgan og‘ir yo‘l-transport hodisasi oqibatida ikki kishi halok bo‘ldi, yana uch nafar fuqaro, jumladan, ikki nafar voyaga yetmagan bola og‘ir tan jarohatlari bilan shifoxonaga yotqizildi.
Poytaxt Ichki ishlar bosh boshqarmasi ma’lum qilishicha, hodisa 30-iyun kuni soat 05:10 atrofida Amir Temur va Bog‘ishamol ko‘chalari chorrahasida yuz bergan. Dastlabki ma’lumotlarga ko‘ra, qayrilayotgan Lacetti avtomobili yuqori tezlikda harakatlangan Kia K5 bilan to‘qnashgan. Kuchli zarba oqibatida Lacetti avtomobili ikkiga bo‘linib ketgan.
Aniqlanishicha, Kia K5 avtomobilini voyaga yetmagan shaxs boshqargan. U tergovga bergan ko‘rsatmasida otasining avtomobilini ruxsatsiz olib chiqqani, do‘stlari bilan mashina haydash maqsadida yo‘lga chiqqani hamda yuqori tezlik sabab chorrahada avtomobilni to‘xtata olmaganini bildirgan. U sodir bo‘lgan fojiadan chuqur afsusdaligini aytib, halok bo‘lganlarning yaqinlari va ota-onasidan uzr so‘ragan.
Voyaga yetmagan haydovchining otasi o‘g‘lining avtomobilni uning ruxsatisiz olib chiqqanini ma’lum qilib, sodir etilgan qilmish uchun qonun doirasida qanday jazo belgilansa, shunga tayyor ekanini bildirgan.
Mazkur hodisa yuzasidan jamoatchilik muhokamasi ham o‘tkazilib, unda mahalla faollari, voyaga yetmaganlarning ota-onalari, ular tahsil olayotgan maktabning pedagoglari va o‘quvchilari ishtirok etgan.
Holat yuzasidan Jinoyat kodeksining 266-moddasi 3-qismi "a" bandi (transport vositalari harakati yoki ulardan foydalanish xavfsizligi qoidalarini buzish odamlar o‘limiga sabab bo‘lishi) bilan jinoyat ishi qo‘zg‘atilgan. Hodisaga huquqiy baho berish maqsadida tergov harakatlari davom ettirilmoqda.
