1 foizlik keshbek bekor qilinmaydi — Soliq qo‘mitasi
Qo‘mitaga ko‘ra, soxta cheklar sabab o‘n minglab fuqarolarning keshbek to‘lovlari vaqtincha to‘xtatilgan.
Soliq qo‘mitasi ijtimoiy tarmoqlarda keshbek tizimi yuzasidan tarqalayotgan xabarlar ortidan rasmiy izoh berdi. Qo‘mitaga ko‘ra, keshbek tizimi bekor qilinmaydi, biroq soxta fiskal cheklar orqali noqonuniy mablag‘ olishga urinishlar aniqlangani sabab ayrim to‘lovlar vaqtincha to‘xtatilgan.
Ma’lum qilinishicha, Prezidentning 2023-yil 5-apreldagi PQ–113-son qaroriga muvofiq, “Ijtimoiy himoya yagona reyestri”ga kiritilgan fuqarolarga qo‘y, mol va parranda go‘shti, tuxum, o‘simlik yog‘i, un, shakar, dori vositalari hamda tibbiy xizmatlar xaridi uchun odatdagi 1 foizlik keshbek o‘rniga to‘langan qo‘shilgan qiymat solig‘i (QQS) to‘liq qaytariladi.
Biroq Soliq qo‘mitasi ayrim fuqarolar va tadbirkorlik subyektlari ushbu imtiyozdan noqonuniy foydalanishga uringanini bildirgan. Xususan, soxta yoki haqiqatga to‘g‘ri kelmaydigan fiskal cheklar rasmiylashtirilib, asossiz ravishda QQSni qaytarib olish holatlari aniqlangan.
Qo‘mita ma’lumotiga ko‘ra, joriy yil may oyida respublika bo‘yicha 389 ta korxonaga tegishli soxta cheklar orqali keshbek olishga uringan 248,5 ming nafar fuqaro shubhali xaridorlar reyestriga kiritilgan. Natijada 83,1 milliard so‘mlik keshbek to‘lovlari vaqtincha to‘xtatilgan.
Hududlar kesimida aprel–may oylarida:
- Navoiy viloyatida 13 ta MCHJga tegishli cheklar orqali rasmiylashtirilgan 34,8 milliard so‘mlik keshbek to‘liq ushlab qolingan;
- Farg‘ona viloyatida 38,3 milliard so‘mlik keshbekning 3,9 milliard so‘mi tasdiqlanib, 34,4 milliard so‘mi to‘lanmagan;
- Andijon viloyatida esa 34,1 milliard so‘mlik keshbekning 5,8 milliard so‘mi tasdiqlanib, 23,8 milliard so‘mi ushlab qolingan.
Soliq qo‘mitasi keshbek tizimini bekor qilish yoki cheklash rejalashtirilmaganini ta’kidladi. Qayd etilishicha, ushbu mexanizm xarid madaniyatini oshirish, fiskal intizomni mustahkamlash, naqd pulsiz hisob-kitoblarni rag‘batlantirish hamda yashirin iqtisodiyot ulushini qisqartirishga xizmat qiladi.
Shu bilan birga, fuqarolarga faqat o‘zlari amalga oshirgan xaridlar uchun berilgan fiskal cheklarni “Soliq” ilovasida ro‘yxatdan o‘tkazish, boshqa shaxslarga tegishli cheklardan foydalanmaslik tavsiya etildi.
Qo‘mita soxta cheklarni sotish yoki xarid qilish holatlariga duch kelgan fuqarolarni Soliq organlarining Komplayens va korrupsiyaga qarshi nazorat bo‘linmalariga murojaat qilishga chaqirdi.
