Erdo‘g‘an NATO yetakchilariga revolver sovg‘a qildi

Turkiya Prezidenti Rajab Toyib Erdo‘g‘an Anqarada bo‘lib o‘tgan NATO sammiti yakunida davlat va hukumat rahbarlariga noodatiy sovg‘a — ism-sharifi o‘yib yozilgan revolver va jonli o‘q-dorilarni topshirdi. Bu haqda Reuters agentligi xabar berdi.

 

Qayd etilishicha, sovg‘a Turkiyaning mudofaa sanoati salohiyatini namoyish etish maqsadida taqdim etilgan. Yetakchilarga 1990-yillarda Turkiyaning MKE kompaniyasi ishlab chiqargan kamyob Gumusay .357 Magnum revolveri yog‘och qutida topshirilgan. Qutiga Turkiya bayrog‘i va NATO logotipi tushirilgan bo‘lib, unda turk va ingliz tillarida “Gumusay — mamlakatimizda ishlab chiqarilgan ilk revolver turidagi to‘pponcha” degan yozuv ham mavjud.

 

Ispaniya Bosh vaziri Pedro Sanches matbuot kotibiga ko‘ra, barcha delegatsiya rahbarlariga bir xil modeldagi revolver berilgan va ularning har biriga egasining ismi o‘yib yozilgan.

 

Sovg‘a ayrim davlatlar uchun logistika va bojxona bilan bog‘liq muammolarni ham yuzaga keltirgan. Belgiya Bosh vaziri Bart De Vever revolverni Bryussel aeroporti politsiyasiga topshirgan bo‘lsa, Polsha Prezidenti Karol Navrotskiyga berilgan qurol Varshava aeroportida bojxona rasmiylashtiruvidan o‘tishni kutmoqda.

 

Niderlandiya va Shvetsiya bosh vazirlari idoralari revolverlar Anqaradagi elchixonalarga olib ketilganini ma’lum qilgan. Niderlandiyaga berilgan qurol foydalanishga yaroqsiz holga keltirilishi rejalashtirilgan, Shvetsiyaniki esa import hujjatlari rasmiylashtirilishini kutmoqda.

 

Reuters manbasiga ko‘ra, Buyuk Britaniya Bosh vaziri Kir Starmerga revolver bilan birga qurolni tozalash to‘plami va 500 dona o‘q ham berilgan. Italiya Bosh vaziri Jorja Melonining sovg‘asi esa Rimdagi hukumat qarorgohida saqlanmoqda. Yevropa komissiyasi prezidenti Ursula fon der Lyayen o‘ziga berilgan revolverni harbiy muzeyga topshirishni rejalashtirmoqda.

 

Jenevadagi Small Arms Survey ma’lumotiga ko‘ra, Turkiya 2019–2024-yillarda yengil qurol eksporti bo‘yicha AQSH va Italiyadan keyin dunyoda uchinchi o‘rinni egallagan. Mamlakat ushbu davrda qariyb 3 milliard dollarlik yengil qurol eksport qilgan.