Qaysi yo‘nalishga necha ball kerak? O‘qishni ko‘chirish mezonlari ma’lum bo‘ldi

 

2026/2027-o‘quv yili uchun xorijiy hamda nodavlat oliy ta’lim muassasalaridan O‘zbekiston davlat oliy ta’lim tashkilotlariga o‘qishni ko‘chirish bo‘yicha minimal o‘tish ballari tasdiqlandi.

 

Oliy ta’lim, fan va innovatsiyalar vazirining tegishli buyrug‘iga muvofiq, o‘qishni ko‘chirish maqsadida o‘tkaziladigan maxsus sinovlar uchun minimal o‘tish ballari ta’lim yo‘nalishlari kesimida 60 balldan 165 ballgacha etib belgilandi.

 

Tasdiqlangan mezonlarga ko‘ra, eng yuqori o‘tish bali huquq yo‘nalishi uchun — 165 ball, eng past ko‘rsatkich esa veterinariya yo‘nalishi uchun — 60 ball etib belgilangan.

 

Yo‘nalishlar bo‘yicha minimal o‘tish ballari quyidagicha:

• Huquq — 165 ball;

• Siyosatshunoslik, xalqaro munosabatlar, jahon iqtisodiyoti va xalqaro iqtisodiy munosabatlar — 140 ball;

• Sog‘liqni saqlash — 132 ball;

• San’at, ijtimoiy fanlar, jurnalistika, biznes va boshqaruv — 105 ball;

• Transport xizmatlari — 104 ball;

• Ta’lim, gumanitar fanlar, tillar, atrof-muhit, matematika va statistika, axborot-kommunikatsiya texnologiyalari hamda ijtimoiy ta’minot — 94 ball;

• Biologik fanlar, fizika va xizmat ko‘rsatish — 80 ball;

• Muhandislik, ishlab chiqarish va arxitektura — 75 ball;

• Qishloq, o‘rmon va baliq xo‘jaligi hamda mehnat muhofazasi — 70 ball;

• Veterinariya — 60 ball.

 

Vazirlikning eslatishicha, xorijiy oliy ta’lim muassasalaridan O‘zbekiston davlat oliy ta’lim tashkilotlarining mos yoki turdosh bo‘lmagan bakalavriat ta’lim yo‘nalishlariga o‘qishni ko‘chirishga ruxsat berilmaydi.