O‘zbekistonda mehnat nizolarini ko‘ruvchi ixtisoslashgan sudyalar faoliyati yo‘lga qo‘yiladi

2026-yil 1-avgustdan boshlab O‘zbekistonda fuqarolik ishlari bo‘yicha sudlarda mehnat nizolarini ko‘rishga ixtisoslashgan sudyalar faoliyat boshlaydi. Bu haqda Oliy sud Rayosatining tegishli qarorida belgilandi.

 

Qarorga ko‘ra, fuqarolik ishlari bo‘yicha sudlarning mavjud shtat birliklari doirasida mehnat nizolarini ko‘ruvchi alohida sudyalar korpusi shakllantiriladi.

 

Unga muvofiq, Oliy sudning Fuqarolik ishlari bo‘yicha sudlov hay’atida 4 nafar, Qoraqalpog‘iston Respublikasi sudi, viloyatlar va Toshkent shahar sudlarining fuqarolik ishlari bo‘yicha sudlov hay’atlarida esa 3 nafardan ixtisoslashgan sudya faoliyat yuritadi.

 

Shuningdek, Nukus, Buxoro, Jizzax, Qarshi, Karmana, Namangan, Termiz, Ohangaron, Farg‘ona va Urganch tumanlararo sudlarida 2 nafardan sudya mehnat nizolarini ko‘rishga ixtisoslashtiriladi. Samarqand shahar sudi hamda Toshkent shahrining Mirzo Ulug‘bek, Mirobod, Shayxontohur, Uchtepa va Yakkasaroy tumanlararo sudlarida ham 2 nafardan shunday sudya faoliyat olib boradi. Kattaqo‘rg‘on, O‘rtachirchiq va Yangiyo‘l tumanlararo sudlarida esa bittadan ixtisoslashgan sudya ishlaydi.

 

Qarorga asosan, 2026-yil 1-avgustdan keyin sudlarga kelib tushadigan mehnat nizolariga oid arizalar ixtisoslashgan sudyalar o‘rtasida taqsimlanadi.

 

Mazkur sanaga qadar kelib tushgan, shu jumladan ish yurituviga qabul qilingan fuqarolik ishlari esa avval amalda bo‘lgan tartib asosida ko‘rib chiqilib, yakunlanadi.