Toshkentda Milliy gvardiya xodimi kanalda cho‘kayotgan ayolni qutqarishga urinib, halok bo‘ldi
Kuchli suv oqimi sabab ayolni qutqarishning imkoni bo‘lmagan va ayol ham suvga cho‘kib ketgan.
Ijtimoiy tarmoqlarda Toshkent shahridagi "Xotira xiyoboni" yodgorlik majmuasi yaqinidan oqib o‘tuvchi kanalda ayolni qutqarishga uringan Milliy gvardiya harbiy xizmatchisi halok bo‘lgani aks etgan videolar tarqaldi.
Milliy gvardiya Toshkent shahar boshqarmasi axborot xizmatining ma’lum qilishicha, harbiy xizmatchilar kanal bo‘ylab oqib ketayotgan ayolni ko‘rib qolgan va uning hayotini saqlab qolish maqsadida zudlik bilan qutqaruv choralarini ko‘rgan.
Harbiy xizmatchilardan biri suvga tushib, ayolni qutqarishga uringan. Biroq kanalning kuchli oqimi tufayli fuqaroni saqlab qolishning imkoni bo‘lmagan va ayol suvga cho‘kib ketgan.
Ma’lum qilinishicha, o‘zini kanalga tashlagan ayol shu kunning o‘zida qidiruv ishlari natijasida topilgan va uning jasadi yaqinlariga topshirilgan.
Qutqaruv vaqtida kuchli suv oqimi va girdob ta’sirida qolgan Milliy gvardiya harbiy xizmatchisi esa bedarak yo‘qolgan. Uning jasadi qidiruv-qutqaruv xizmatlari hamda hamkor tashkilotlar ishtirokida o‘tkazilgan maxsus qidiruv ishlari natijasida topildi.
Dastlabki ma’lumotlarga ko‘ra, halok bo‘lgan harbiy xizmatchi 2005-yilda tug‘ilgan bo‘lib, yaqin kunlarda uning to‘yi bo‘lishi rejalashtirilgan edi.
