Zangiotada fuqaro MIBga qarshilik qilib, binoga o‘t qo‘ydi

Ijtimoiy tarmoqlarda Toshkent viloyatining Zangiota tumanida noqonuniy qurib olingan tikuvchilik sexi MIB xodimlari tomonidan buzilib, uning ichida bo‘lgan buyumlar yoqib yuborilgani aytilgan videolar tarqalib, muhokamalarga sabab bo‘lmoqda.

 

Majburiy ijro byurosining Zamon.uz'ga maʼlum qilishicha, Fuqarolik ishlari bo‘yicha Zangiota tumanlararo sudining ijro varaqasiga asosan qarzdor T.Shukurova tomonidan Zangiota tumani “Eshonguzar” ko‘rg‘onidan o‘tuvchi avtomobil yo‘lining muhofaza mintaqasida qurilgan 100,1 kv.metrdan iborat noqonuniy qurilmani o‘zining hisobidan buzish to‘g‘risidagi ijro hujjati bo‘lim ish yurituviga kelib tushgan.

 

Ijro harakatlari davomida yuqorida ko‘rsatilgan noqonuniy qurilmani ixtiyoriy muddatda buzish uchun qarzdor T.Shukurova bir necha marotaba ogohlantirilganiga qaramasdan noqonuniy qurilmani buzishdan bo‘yin tovlab kelgan.

 

Shundan so‘ng, joriy yilning 20-iyul kuni qarzdor T.Shukurovaga noqonuniy qurilmani bo‘shatish va o‘z hisobidan buzib olish, aks holda majburiy tartibda buzilishi haqida takroran ogohlantirilgan. Biroq, qarzdor T.Shukurova ogohlantirilganidan keyin oradan 17 kun o‘tgan bo‘lsa-da, qaror ijrosini bajarishdan bo‘yin tovlab kelgan.

 

8 iyul kuni davlat ijrochilari tomonidan noqonuniy qurilmani buzish ijro hujjati ijrosini taʼminlash maqsadida manzilga borishganida, noqonuniy qurilmani bo‘shatishdan bo‘yin tovlab, ijro harakatlariga qarshilik ko‘rsatgan.

 

Bundan tashqari, qarzdor T.Shukurovaning singlisi ijro harakatlarini to‘xtatish maqsadida, noqonuniy qurilmada ko‘rpalarni yoqish yo‘li bilan yong‘in holatini sodir etgan va bu holat favqulodda vaziyatlar tezkor xodimlari tomonidan darhol bartaraf etilgan.

 

Ijro harakatlari davomida qarzdor T.Shukurova va uning yaqin qarindoshlariga shikast yetkazilmagan va noqonuniy qurilma esa buzilib, ijro hujjati ijrosi taʼminlangan.