Islom sivilizatsiyasi forumi yakunlandi: ishtirokchilar Prezidentga murojaat yo‘lladi

Toshkent shahrida Islom sivilizatsiyasi bo‘yicha I xalqaro forumning tantanali yopilish marosimi bo‘lib o‘tdi. Bir necha kun davomida Toshkent, Samarqand va Termiz shaharlarida tashkil etilgan nufuzli xalqaro anjuman yakunida forum ishtirokchilarining O‘zbekiston Prezidenti Shavkat Mirziyoyev nomiga murojaati o‘qib eshittirildi.

 

Yakunlovchi yalpi yig‘ilishni O‘zbekistondagi Islom sivilizatsiyasi markazi direktori Firdavs Abduxoliqov ochib berdi. U forum qisqa vaqt ichida islom sivilizatsiyasi tarixi, ilmiy merosi va zamonaviy taraqqiyotiga bag‘ishlangan eng yirik xalqaro muloqot maydonlaridan biriga aylanganini ta’kidladi hamda barcha ishtirokchilarga faol ishtiroki va ilmiy hissasi uchun minnatdorlik bildirdi.

 

Qayd etilishicha, forumda dunyoning 46 davlatidan 500 nafardan ortiq olim, tadqiqotchi, davlat va jamoat arbobi, xalqaro tashkilotlar hamda ilmiy muassasalar vakillari qatnashdi.

 

Forum doirasida Toshkent shahrida 14 ta yalpi va 6 ta sho‘ba yig‘ilishi, Samarqandda 3 ta xalqaro ilmiy konferensiya va 11 ta yalpi yig‘ilish, Termizda esa 1 ta xalqaro konferensiya hamda 2 ta sho‘ba yig‘ilishi tashkil etildi. Uchala shahardagi ilmiy anjumanlarda jami 129 ta ma’ruza tinglandi.

 

Shuningdek, forum davomida Islom sivilizatsiyasiga bag‘ishlangan qator ilmiy va nashriyot loyihalari taqdim etildi. Yakunda Forum deklaratsiyasi qabul qilinib, 2027–2031-yillarga mo‘ljallangan xalqaro hamkorlik yo‘l xaritasi tasdiqlandi. Beshta kitob taqdimoti o‘tkazildi, oltita anglashuv memorandumi va hamkorlik shartnomasi imzolandi.

 

Forum ishtirokchilarining Prezident Shavkat Mirziyoyev nomiga yo‘llagan murojaatida mazkur xalqaro anjuman insoniyatning umumiy ma’naviy va intellektual merosini asrashga xizmat qiluvchi global hamkorlikning yangi bosqichi sifatida baholandi.

 

Murojaatda Prezident tashabbusi bilan tashkil etilgan O‘zbekistondagi Islom sivilizatsiyasi markazi so‘nggi o‘n yillikdagi eng muhim xalqaro gumanitar tashabbuslardan biri ekani alohida e’tirof etildi. Shuningdek, markaz kelgusida dunyoning yetakchi olimlari, universitetlari, muzeylari va ilmiy muassasalarini birlashtiruvchi yirik xalqaro ilmiy-ma’rifiy platformaga aylanishiga ishonch bildirildi.

 

Forum ishtirokchilari O‘zbekistonda tarixiy merosni asrash, ilm-fanni rivojlantirish va sivilizatsiyalararo muloqotni mustahkamlash borasida amalga oshirilayotgan islohotlarni yuqori baholab, Islom sivilizatsiyasini o‘rganish, asrash va targ‘ib qilish bo‘yicha Butunjahon alyansini tashkil etish tashabbusini ilgari surdilar.

 

Yakunda Prezidentimiz Shavkat Mirziyoyevga, O‘zbekiston hukumati, forum tashkilotchilari va O‘zbekiston xalqiga forumni yuksak saviyada tashkil etgani hamda samimiy mehmondo‘stlik uchun minnatdorlik bildirildi.