Ispaniyadagi o‘rmon yong‘inida 12 kishi halok bo‘ldi

 
Ispaniyaning janubi-sharqidagi Andalusiya avtonom hududida yuz bergan yirik o‘rmon yong‘ini oqibatida kamida 12 kishi halok bo‘ldi. Hodisa mamlakat va Janubiy Yevropaning boshqa hududlarida davom etayotgan kuchli jazirama fonida sodir bo‘ldi. Bu haqda BBC xabar berdi.

 
Yong‘in Los Galyardos shaharchasi yaqinida boshlangan. Dastlabki ma'lumotlarga ko‘ra, elektr uzatish tarmog‘idagi nosozlik oqibatida qulagan sim quruq o‘simliklarni yondirib yuborgan. Kuchli shamol va havo haroratining 40 darajaga yaqinlashgani sabab olov qisqa vaqt ichida katta hududga tarqalgan.

 
Mahalliy hukumat ma'lumotiga ko‘ra, halok bo‘lganlarning aksariyati avtomobillarda qochishga uringan paytda olov qurshovida qolgan. Yana bir necha kishi kuyish va tutundan zaharlanish alomatlari bilan shifoxonaga yotqizilgan. O‘nlab aholi xavfsiz hududlarga evakuatsiya qilinib, vaqtinchalik boshpanalarga joylashtirilgan.

 
Yong‘inni o‘chirish ishlariga yuzlab o‘t o‘chiruvchilar, vertolyotlar va maxsus aviatsiya jalb etilgan. Biroq yuqori harorat, kuchli shamol hamda quruq ob-havo olovni nazorat ostiga olishni qiyinlashtirmoqda. Ayrim avtomobil yo‘llari yopilgan, aholiga zarurat bo‘lmasa uylarini tark etmaslik tavsiya etilgan.

 
Ispaniya bosh vaziri Pedro Sanches halok bo‘lganlarning oila a'zolariga hamdardlik bildirib, hukumat jabrlanganlarga zarur yordam ko‘rsatilishini ma'lum qildi. Andalusiya hukumati ham yong‘in oqibatlarini bartaraf etish uchun barcha zarur kuch va vositalar safarbar etilganini bildirdi.

 
Ayni paytda Janubiy Yevropaning boshqa mamlakatlari ham jazirama va yirik yong‘inlarga duch kelmoqda. Fransiya, Portugaliya va Gretsiyada ham o‘nlab o‘rmon yong‘inlari qayd etilgan. Meteorologlar havo haroratining yaqin kunlarda ham yuqori bo‘lishi va yong‘in xavfi saqlanib qolishidan ogohlantirmoqda.