Madaniyat vazirligi va Kinematografiya agentligi rahbariyatida o‘zgarishlar bo‘ldi
Madaniyat vazirining to‘rt nafar o‘rinbosari lavozimidan ozod etilib, yangilari tayinlandi. Hasan Salihov Prezidentning madaniyat bo‘yicha vakili bo‘ldi.
O‘zbekiston prezidenti qarorlari bilan Madaniyat vazirligi hamda vazirlik huzuridagi Kinematografiya agentligi rahbariyatida qator lavozim tayinlovlari va o‘zgarishlar amalga oshirildi. Bu haqda Prezident matbuot kotibi Sherzod Asadov ma’lum qildi.
Unga ko‘ra, Nodirbek Sayfullayev madaniyat vazirining birinchi o‘rinbosari etib tayinlandi. Odiljon Abduqahorov esa madaniyat vaziri o‘rinbosari lavozimini egalladi.
Jahongir Axmedov madaniyat vazirining birinchi o‘rinbosari — Madaniyat vazirligi huzuridagi Kinematografiya agentligi direktori etib tayinlandi. U ushbu lavozimda Shuxratulla Rizayevning o‘rnini egalladi. Axmedov 2025-yil may oyidan buyon Bolalar kontentini rivojlantirish markaziga rahbarlik qilib kelayotgan edi.
Shuningdek, Sanjar Bobojonov madaniyat vaziri o‘rinbosari etib tayinlandi. Shu munosabat bilan u prezidentning madaniyat bo‘yicha vakili bo‘linmasi bosh inspektori lavozimidan ozod etildi.
Boshqa ishga o‘tishi munosabati bilan Baxodir Axmedov va Avazxon Tajixanov madaniyat vazirining birinchi o‘rinbosari, Murodjon Majidov hamda Yusufjon Usmonov esa madaniyat vaziri o‘rinbosari lavozimidan ozod qilindi.
Bundan tashqari, Hasan Salihov prezidentning madaniyat bo‘yicha vakili etib tayinlandi. U mazkur tayinlovga qadar Kreativ industriya parki direktori lavozimida faoliyat yuritgan.
