Navoiyda 3 kishi Zarafshon daryosiga cho‘kib ketdi
Hodisa 8-iyul kuni sodir bo‘lgan. Fuqarolarning jasadi 10-iyul kuni topildi.
Navoiy viloyatining Karmana tumanida Zarafshon daryosiga cho‘kib ketgan uch nafar fuqaroning jasadi qidiruv-qutqaruv ishlari davomida topildi. Bu haqda viloyat Favqulodda vaziyatlar boshqarmasi ma’lum qildi.
Ma’lum qilinishicha, 8-iyul kuni soat 13:50 da Zarafshon daryosining Karmana tumani "Katta masjid" mahallasi hududidan oqib o‘tuvchi qismida uch nafar fuqaro cho‘milish uchun daryoga kirib, ehtiyotsizlik oqibatida cho‘kib ketgani haqida FVBga xabar kelib tushgan.
Shundan so‘ng voqea joyiga viloyat Favqulodda vaziyatlar boshqarmasining Maxsus qutqaruv otryadi g‘avvoslari hamda boshqa tegishli xizmatlar jalb etilgan.
Olib borilgan qidiruv-qutqaruv ishlari natijasida 10-iyul kuni uchala fuqaroning jasadi Zarafshon daryosining Karmana tumani hududidan oqib o‘tuvchi qismidan topildi.
Voqea joyiga viloyat FVB, tuman IIB va prokuratura masʼullari chiqqan.
