O‘zbekistonda 2030-yilgacha kamida 5 ta oliygoh dunyoning eng yaxshi 500 ta universiteti qatoriga kiritiladi

Prezident Shavkat Mirziyoyev xalqaro ta’lim standartlari asosida o‘rta maxsus, kasbiy va oliy ta’lim dasturlarini joriy etish hamda nufuzli xorijiy universitetlar bilan akademik hamkorlikni kengaytirishga oid takliflar taqdimoti bilan tanishdi.

 

Taqdimotda qayd etilishicha, so‘nggi sakkiz yilda oliy ta’lim tizimida amalga oshirilgan islohotlar natijasida oliy ta’lim bilan qamrov darajasi 9 foizdan 44 foizga, talabalar soni esa 270 ming nafardan 1,7 million nafarga yetgan.

 

Joriy yilda 643 ta texnikumning 100 tasida Germaniya, Buyuk Britaniya, Shveysariya, Xitoy va Janubiy Koreyaning ilg‘or kasbiy ta’lim dasturlari joriy etilmoqda.

 

Shuningdek, “Toshkent irrigatsiya va qishloq xo‘jaligini mexanizatsiyalash muhandislari instituti” milliy tadqiqot universiteti hamda O‘zbekiston Milliy universiteti xalqaro reytinglarda dunyoning eng yaxshi mingta oliy ta’lim muassasasi qatoridan joy oldi. Oliy ta’lim muassasalaridagi 157 ta ta’lim dasturi xalqaro akkreditatsiyadan o‘tkazilgan.

 

Taqdimotda ta’lim sifatini oshirish, oliygohlarning xalqaro raqobatbardoshligini kuchaytirish va bitiruvchilarning global mehnat bozoridagi imkoniyatlarini kengaytirish bo‘yicha yangi vazifalar belgilandi.

 

Xususan, 2030-yilgacha kamida beshta oliy ta’lim muassasasini umumiy reytinglarda, yana o‘nta oliygohni fan yo‘nalishlari bo‘yicha dunyoning eng yaxshi 500 talik universitetlari qatoriga kiritish maqsad qilingan. Shuningdek, 100 ta oliygoh ta’lim dasturini xalqaro akkreditatsiyadan o‘tkazish hamda kamida 150 ta texnikumda xalqaro ta’lim dasturlarini joriy etish rejalashtirilgan.

 

Bundan tashqari, oliy ta’lim muassasalari bitiruvchilari va pedagoglarining kamida 30 foizini xorijiy til hamda mutaxassislik bo‘yicha xalqaro sertifikatlar bilan ta’minlash, 2,5 ming nafar texnikum va 20 ming nafar oliygoh pedagogini xorijda malaka oshirishga yuborish vazifasi belgilandi.