O‘zbekistonda 3 mingga yaqin manfaatlar to‘qnashuvi holati aniqlandi

 

Korrupsiyaga qarshi kurashish agentligi davlat organlari va tashkilotlarida manfaatlar to‘qnashuvining oldini olish bo‘yicha amalga oshirilgan ishlarni kompleks tahlil qildi. Natijada 2 951 ta manfaatlar to‘qnashuvi holati aniqlangani ma’lum bo‘ldi.

 

Agentlik ma’lumotiga ko‘ra, davlat organlari va tashkilotlari xodimlari tomonidan 336 ta mavjud manfaatlar to‘qnashuvi to‘g‘risidagi xabarnoma taqdim etilgan. Shuningdek, ehtimoliy manfaatlar to‘qnashuviga oid 627 385 ta deklaratsiya rasmiylashtirilgan.

 

Tahlil natijasida 446 ta mavjud hamda 2 505 ta ehtimoliy manfaatlar to‘qnashuvi aniqlanib, ularning umumiy soni 2 951 tani tashkil etgan.

 

Qonunchilik talablariga muvofiq 865 ta holat yuzasidan manfaatlar to‘qnashuvini bartaraf etish choralari ko‘rilgtan. Jumladan:

• 138 nafar xodim boshqa rahbar bo‘ysunuviga o‘tkazilgan;

• 11 nafar xodim kollegial organ tarkibidan chiqqan;

• 21 nafar xodimning xizmat vakolatlari qayta ko‘rib chiqilgan;

• 51 nafar xodimning ayrim axborot va hujjatlardan foydalanishi cheklangan;

• 301 nafar xodimning yakka tartibda qaror qabul qilish vakolati ustidan kollegial nazorat o‘rnatilgan;

• 87 nafar xodimga shaxsiy manfaatdorlikni bartaraf etish bo‘yicha tavsiyalar berilgan;

• 196 nafar xodim shaxsiy manfaatdorligidan ixtiyoriy voz kechgan;

• 60 nafar xodim boshqa lavozimga o‘tkazilgan yoki ular bilan mehnat shartnomasi bekor qilingan.

 

O‘rganishlar davomida vazirliklar hamda mahalliy ijro etuvchi hokimiyat organlarida manfaatlar to‘qnashuvining oldini olish bo‘yicha belgilangan cheklovlarga rioya etilmagan 831 ta holat aniqlagan. Shundan 60 tasi vazirliklar, 771 tasi esa mahalliy hokimliklar hissasiga to‘g‘ri keladi.

 

Mazkur qonunbuzarliklar yuzasidan Ma’muriy javobgarlik to‘g‘risidagi kodeksning 193-4-moddasi asosida 168 ta ma’muriy huquqbuzarlik to‘g‘risidagi bayonnoma rasmiylashtirilib, sud qarorlariga muvofiq aybdorlarga nisbatan jarima jazosi qo‘llanilgan.

 

Korrupsiyaga qarshi kurashish agentligi davlat organlari va tashkilotlarida manfaatlar to‘qnashuvining oldini olish hamda bu boradagi qonunchilik talablariga rioya etilishi ustidan nazoratni izchil davom ettirishini ma’lum qildi.