Putin kuzda yangi safarbarlik e'lon qilishi mumkin

Rossiya prezidenti Vladimir Putin joriy yil kuzida mamlakatda yangi harbiy safarbarlik e'lon qilishi mumkin. Bunday taxminni Chexiya prezidenti, iste'fodagi general Petr Pavel bildirdi. Uning fikricha, Rossiya sentyabr oyidagi parlament saylovlaridan keyin Ukrainadagi urushni yanada kuchaytirishga urinishi ehtimoli yuqori.

 

Pavelning aytishicha, Putin saylovlardan oldin ommaviy safarbarlik e'lon qilishdan tiyilishi mumkin, chunki bu qaror ichki siyosiy norozilikni kuchaytirish xavfini tug‘diradi.

 
"Rossiyada sentyabr oyida parlament saylovlari bo‘lib o‘tadi. Putin saylovlargacha safarbarlik e'lon qilishi ehtimoldan yiroq. Ammo saylovlardan keyin vaziyat o‘zgarishi mumkin", degan u.

 
Chexiya prezidenti Ukraina va uning ittifoqchilarida vaziyatni diplomatik yo‘l bilan hal qilish uchun cheklangan vaqt qolganini ta'kidlagan.

 
"Biz Rossiyaga muzokaralarni boshlashga tayyor ekanimiz haqida aniq signal berishda davom etishimiz kerak. Ammo buning uchun bosimni ham saqlab qolish zarur", degan Pavel.

 
So‘nggi haftalarda Ukraina Rossiyaning neft sanoatiga qarshi uzoq masofali dron hujumlarini sezilarli darajada kuchaytirdi. Reuters'ning Kremlga yaqin manbalarga tayanib yozishicha, aynan ushbu zarbalar Putinni urushni to‘xtatishdan ko‘ra, aksincha, harbiy harakatlarni kuchaytirishga undamoqda. Manbalarga ko‘ra, Kreml rahbari hozircha sulh bo‘yicha takliflarni qabul qilish niyatida emas.

 
Tahlilchilarning aytishicha, Ukraina hujumlari Rossiyaning yirik neftni qayta ishlash zavodlari va yoqilg‘i omborlariga jiddiy zarar yetkazgan. Natijada mamlakatning neftni qayta ishlash quvvati sezilarli darajada kamaygan, ayrim hududlarda esa benzin va dizel taqchilligi kuzatilmoqda. Bu Rossiyaning urushni moliyalashtirish imkoniyatlariga ham bosim o‘tkazmoqda.

 
Reuters suhbatlashgan Kremlga yaqin uch manbaning aytishicha, Putin urushni davom ettirish tarafdori bo‘lib qolmoqda. U Donetsk va Lugansk viloyatlarining to‘liq nazoratini qo‘lga kiritishni asosiy maqsad deb bilmoqda hamda AQSH prezidenti Donald Tramp ilgari surayotgan tinchlik tashabbuslarini hozircha qabul qilish niyatida emas. Manbalardan biri yaqin oylarda harbiy harakatlar yanada kuchayishi ehtimoli "juda yuqori" ekanini bildirgan.

 
Ayni paytda Rossiya hukumati yangi umumiy safarbarlik e'lon qilishi bo‘yicha rasmiy bayonot bergani yo‘q. Kreml ham Petr Pavelning bu haqdagi fikrlariga izoh bermagan. Shu sababli hozircha bu ma'lumotlar rasmiy qaror emas, balki ekspertlar va siyosatchilar bildirayotgan ehtimoliy ssenariy sifatida baholanmoqda.