Saida Mirziyoyeva Dilnozaxon Kattaxanovani yangi lavozimi bilan tabrikladi
Xotin-qizlar bandligini ta’minlash, zo‘ravonlikning oldini olish va og‘ir hayotiy vaziyatdagi ayollarni qo‘llab-quvvatlash ustuvor vazifalar bo‘lishi kerakligi ta’kidlandi.
Prezident administratsiyasi rahbari Saida Mirziyoyeva Dilnozaxon Kattaxanovaning O‘zbekiston Bosh vazirining xotin-qizlar masalalari bo‘yicha o‘rinbosari lavozimiga tayinlangani munosabati bilan uni tabrikladi.
Mirziyoyeva o‘zining ijtimoiy tarmoqdagi sahifasida ushbu lavozim 19 milliondan ortiq xotin-qizlarning manfaat va ehtiyojlari bilan bog‘liq katta mas’uliyat ekanini ta’kidladi.
Uning qayd etishicha, xotin-qizlar bandligini ta’minlash, xorijdagi hamyurtlarni qo‘llab-quvvatlash hamda zo‘ravonlikning oldini olish kabi masalalar vaqtinchalik choralar bilan emas, balki puxta ishlab chiqilgan tizimli yondashuv asosida hal etilishi lozim.
Shuningdek, Saida Mirziyoyeva jazo muddatini o‘tayotgan, uyidan va farzandlaridan uzoqda mehnat qilayotgan hamda og‘ir hayotiy vaziyatga tushib qolgan xotin-qizlarga alohida e’tibor qaratish zarurligini ta’kidladi.
“Og‘ir hayotiy vaziyatga tushib qolgan ayollar: jazo muddatini o‘tayotgan, uyi va farzandlaridan uzoqda mehnat qilayotgan xotin-qizlarga alohida e’tibor qaratilishi lozim. Ular yolg‘izlanib qolmaganlarini, davlat ularning qismatiga befarq emasligini his qilishlari kerak”, deya yozdi Prezident administratsiyasi rahbari.
Yakunda Mirziyoyeva Dilnozaxon Kattaxanovaga yangi faoliyatida oqilalik, qat’iyat va yurtdagi har bir ayol hayotida ijobiy o‘zgarishlar aks etadigan yuksak natijalar tiladi.
