Toshkentda xalqaro universitetlar shaharchasi tashkil etiladi
Shaharchada nufuzli xorijiy oliy ta’lim muassasalari filiallarini ochish, zamonaviy kampuslar va talabalar turar joylarini barpo etish rejalashtirilgan.
Prezident Shavkat Mirziyoyevga ta’lim tizimini xalqaro standartlar asosida rivojlantirishga oid takliflar taqdimoti davomida Toshkent xalqaro universitetlar shaharchasini tashkil etish tashabbusi muhokama qilindi.
Loyihani amalga oshirishda Qatardagi Education City, Birlashgan Arab Amirliklaridagi Dubai International Academic City hamda Janubiy Koreyadagi Incheon Global Campus tajribasidan foydalanish taklif etildi.
Takliflarga ko‘ra, universitetlar shaharchasida nufuzli xorijiy oliy ta’lim muassasalari filiallarini ochish, zamonaviy kampuslar va talabalar turar joylarini barpo etish rejalashtirilgan.
Shuningdek, litsenziyalash talablarini soddalashtirish, grant va stipendiyalar ajratish, bojxona hamda soliq imtiyozlarini qo‘llash, royalti to‘lovlarining bir qismini qoplash mexanizmlarini ishlab chiqish ko‘zda tutilmoqda.
Ta’kidlanishicha, tashabbusning asosiy maqsadi O‘zbekistonni xalqaro ta’lim dasturlari va standartlari keng joriy etilgan, mintaqadagi yetakchi ta’lim markaziga aylantirishdan iborat.
Taqdimot yakunida Prezident Shavkat Mirziyoyev takliflarni ma’qullab, integratsiyalashgan ta’lim dasturlarini bosqichma-bosqich kengaytirish, ularning sifatini xalqaro talablarga moslashtirish hamda nufuzli xorijiy universitetlar bilan uzoq muddatli akademik hamkorlikni yo‘lga qo‘yish bo‘yicha mutasaddilarga topshiriqlar berdi.
