Turizmni filmlar orqali targ‘ib qilish: “Film in Uzbekistan” platformasi yaratiladi
Endi O‘zbekistonda film suratga olgan xorijiy kinokompaniyalarga xarajatlarning 25 foizigacha qoplab beriladi.
Vazirlar Mahkamasining 2026-yil 8-iyuldagi 372-son qarori bilan O‘zbekistonning turistik salohiyatini filmlar orqali targ‘ib qilishga qaratilgan yangi tizim joriy etildi. Bu haqda Turizm qo'mitasi matbuot xizmati xabar berdi.
Qarorga muvofiq, mamlakatda ilk bor xorijiy kinokompaniyalarni jalb etishga xizmat qiluvchi “rebate” dasturi hamda O‘zbekistonning tarixiy-madaniy merosi va turistik salohiyatini xorijiy filmlarda namoyish etishni rag‘batlantiruvchi “country placement” tizimi yo‘lga qo‘yiladi.
“Rebate” dasturi doirasida xorijiy kinokompaniyalarga ularning mamlakat hududida amalga oshirgan xarajatlari hajmiga qarab mablag‘larning bir qismi qaytariladi. Jumladan:
-
3 mlrd so‘mgacha – 10 foiz;
-
3 mlrd so‘mdan 5 mlrd so‘mgacha – 15 foiz;
-
5 mlrd so‘mdan 10 mlrd so‘mgacha – 20 foiz;
-
10 mlrd so‘mdan ortiq – 25 foiz.
Bunda bir loyiha uchun qoplanadigan mablag‘ 4 milliard so‘mdan oshmaydi.
Shuningdek, 2026-yil 1-noyabrga qadar “Film in Uzbekistan” raqamli platformasi ishga tushiriladi. Platformada mamlakatdagi kinolokatsiyalar, suratga olish infratuzilmasi, tarixiy obidalar, rekvizitlar, tarixiy liboslar, maxsus texnikalar hamda kinoturizm imkoniyatlari haqida batafsil ma’lumotlar jamlanadi.
Turizm qo‘mitasiga 2026-yil 1-oktabrga qadar filmlar suratga olish uchun foydalanilishi mumkin bo‘lgan davlat obyektlari, tarixiy yodgorliklar, madaniyat va istirohat bog‘lari hamda boshqa lokatsiyalar ro‘yxatini shakllantirish, ularning ijara tariflarini tasdiqlash va platformaga joylashtirish vazifasi yuklatildi.
Qarorga muvofiq, 2026-yilda xorijiy kinokompaniyalar xarajatlarini qoplash uchun davlat budjetidan 5 milliard so‘m ajratiladi. 2027-yildan boshlab esa ushbu mablag‘lar Davlat budjeti parametrlarida alohida nazarda tutiladi.
Yangi tizim to‘liq raqamlashtiriladi. Arizalar elektron platforma orqali qabul qilinadi, tasdiqlangan loyihalarga maxsus ID raqam va QR-kod beriladi. Suratga olish ishlari yakunlangach, kinokompaniya 60 kun ichida zarur hujjatlarni platformaga yuklaydi. Komissiya hujjatlarni 15 ish kuni davomida ko‘rib chiqadi, kamchiliklar aniqlansa ularni bartaraf etish uchun 10 kun muddat beriladi. Ijobiy xulosa chiqarilgach, kompensatsiya mablag‘lari 5 ish kuni ichida kinokompaniya hisobiga o‘tkaziladi.
