Ali Xomanaiy va boshqa qurbonlar uchun qasos olinadi — Mojtaba Xomanaiy
Eron Oliy Rahbari qasos olish xalq irodasi ekanini bildirib, AQSh va Isroilni javobgarlikka tortishga va’da berdi.
Eron Oliy Rahbari Mujtabo Xomanaiy AQSh va Isroilning hujumlari oqibatida halok bo‘lgan sobiq Oliy Rahbar Ali Xomanaiy hamda boshqa eronliklarning o‘limi uchun qasos olinishi haqida bayonot berdi.
Fars agentligi xabariga ko‘ra, Mujtabo Xomanaiy Islom inqilobi qo‘riqchilari korpusi (IRGC) tomonidan e’lon qilingan murojaatida qasos olish Eron xalqining qat’iy talabi ekanini ta’kidlagan.
“Biz sizning va ushbu urushlarda halok bo‘lgan barcha shahidlarning qoni uchun jinoyatchilarni jazolashga qasamyod qilamiz. Bu qasos xalqimizning irodasidir va u albatta amalga oshadi”, — deyiladi bayonotda.
Uning so‘zlariga ko‘ra, bu jarayon ayrim shaxslarning taqdiriga bog‘liq emas va Eron o‘z maqsadidan voz kechmaydi.
Mazkur bayonot Ali Xomanaiy dafn marosimi munosabati bilan tayyorlangan nutqdan parcha ekani qayd etilgan. IRGC ma’lumotiga ko‘ra, unda Eron xalqining “shahidlar qoni uchun javob berish” qat’iyati yana bir bor ta’kidlangan.
Eslatib o‘tamiz, Eron rasmiylari ma’lumotiga ko‘ra, sobiq Oliy Rahbar Ali Xomenei 28-fevral kuni AQSh va Isroil tomonidan amalga oshirilgan hujumlarda halok bo‘lgan. Shundan so‘ng uning o‘g‘li Mojtaba Xomanaiy mamlakatning yangi Oliy Rahbari etib tayinlangan. Ali Xomanaiy 9-iyul kuni Mashhad shahrida dafn etilgan.
