Andijonda YPX xodimini ayblab, video joylashtirgan haydovchi uzr so'radi
Haydovchi davlat raqam belgisini yashirgani uchun javobgarlikka tortilganidan norozi bo‘lib, bu haqda ijtimoiy tarmoqda video e’lon qilgan.
Andijon viloyatida avtomobilining davlat raqam belgisini qasddan yashirib harakatlangan haydovchiga nisbatan ma’muriy chora ko‘rildi. Keyinchalik u ijtimoiy tarmoqlarda tarqatgan videodagi ayblovlari uchun uzr so‘radi.
Andijon viloyati Yo‘l harakati xavfsizligi boshqarmasi axborot xizmatining ma’lum qilishicha, qulflanib qolgan eshiklarni ochish xizmati bilan shug‘ullanuvchi fuqaro o‘ziga tegishli Matiz rusumli avtomobilning old va orqa davlat raqam belgilarini qora sellofan paket bilan yopgan holda harakatlangan.
Qoidabuzarlik YPX xodimi tomonidan aniqlanib, haydovchi to‘xtatilgan va unga nisbatan belgilangan tartibda qonuniy choralar ko‘rilgan.
Aniqlanishicha, mazkur fuqaro bundan 10 kun avval ham aynan shu YPX xodimi tomonidan davlat raqamini skotch bilan yopgan holda harakatlangani uchun to‘xtatilgan. O‘shanda unga tushuntirish ishlari olib borilib, ogohlantirish bilan cheklanilgan. Shunga qaramay, haydovchi qoidabuzarlikni takrorlagan.
Haydovchi dastlab ushbu holat yuzasidan ijtimoiy tarmoqlarda YPX xodimlarini ayblovchi videoni e’lon qilgan. Biroq keyinchalik o‘z qoidabuzarligini tan olib, ichki ishlar organlari xodimlari tomonidan ko‘rilgan choralar qonuniy bo‘lganini bildirgan hamda obunachilaridan uzr so‘ragan.
Holat yuzasidan Ma’muriy javobgarlik to‘g‘risidagi kodeksning 127-moddasi asosida ma’muriy bayonnoma rasmiylashtirilgan. Qoidabuzarlik sodir etilgan transport vositasi vaqtincha saqlash uchun jarima maydonchasiga joylashtirilgan.
