Janubiy Koreya va AQSHga noqonuniy yuborishni va’da qilgan “uddaburonlar” ushlandi

 

Davlat xavfsizlik xizmati tomonidan Ichki ishlar organlari bilan hamkorlikda o‘tkazilgan tezkor tadbirlar davomida fuqarolarni Janubiy Koreya va AQSHga noqonuniy yuborishni va’da qilgan shaxslarning noqonuniy faoliyatiga chek qo‘yildi. Bu haqda DXX xabar berdi.

 

Birinchi holatda, Toshkent shahrida yashovchi 1994 va 1999-yillarda tug‘ilgan ikki nafar fuqaro o‘zaro til biriktirib, fuqarolarni tanishlari orqali “G-1” vizasi olib berish yo‘li bilan Janubiy Koreyaga ishga yuborish, keyinchalik esa ushbu davlatda doimiy yashash huquqini beruvchi hujjatlarni rasmiylashtirib berishni va’da qilgan.

 

Ular ushbu xizmat evaziga 55 ming AQSH dollari talab qilib, oldindan 25 ming AQSH dollarini olayotgan vaqtida DXX Toshkent shahar boshqarmasi hamda Iqtisodiy jinoyatlarga qarshi kurashish departamenti xodimlari tomonidan ashyoviy dalillar bilan qo‘lga olingan.

 

Ikkinchi holatda esa Namangan viloyati Kosonsoy tumanida yashovchi, 2001-yilda tug‘ilgan, avval Jinoyat kodeksining 168-moddasi (firibgarlik) bilan sudlangan fuqaro boshqa bir shaxsni noqonuniy yo‘llar bilan AQSHga yuborishni va’da qilgan.

 

U fuqaroni “O‘zbekiston – Turkiya – Ispaniya – Meksika – AQSH” yo‘nalishi orqali yuborishni taklif qilib, buning evaziga 50 ming AQSH dollari talab qilgan.

 

DXX hamda Iqtisodiy jinoyatlarga qarshi kurashish departamenti xodimlari tomonidan Toshkent shahrida o‘tkazilgan tezkor tadbir davomida gumonlanuvchi kelishilgan mablag‘ning bir qismi — 20 ming AQSH dollarini olayotgan vaqtida ushlandi.

 

Mazkur holatlar yuzasidan gumonlanuvchilarga nisbatan jinoyat ishlari qo‘zg‘atilib, tergov harakatlari olib borilmoqda.