O‘zbekiston va Qozog‘iston transchegaraviy suvlarni birgalikda boshqaradi

 

Qozog‘iston Prezidenti Qosim-Jomart To‘qayev O‘zbekiston va Qozog‘iston hukumatlari o‘rtasida transchegaraviy suv obyektlarini birgalikda boshqarish hamda ulardan oqilona foydalanish to‘g‘risidagi bitimni ratifikatsiya qilish haqidagi qonunni imzoladi.

 

Mazkur bitim 2025-yil 15-noyabr kuni Toshkent shahrida imzolangan bo‘lib, u transchegaraviy suv resurslaridan adolatli va oqilona foydalanish, ularni birgalikda boshqarish hamda davlatlararo ahamiyatga ega suv xo‘jaligi obyektlarining ishonchli va xavfsiz ishlashini ta’minlashga qaratilgan.

 

Bitimga muvofiq, O‘zbekiston va Qozog‘iston o‘rtasida transchegaraviy suv obyektlarini boshqarish bo‘yicha hukumatlararo komissiya tashkil etiladi. Mazkur komissiya umumiy suv resurslaridan foydalanish, davlatlararo gidrotexnika inshootlarini ekspluatatsiya qilish hamda ularning xavfsizligini ta’minlash bilan bog‘liq masalalarni muvofiqlashtirib boradi.

 

Shuningdek, tomonlar suv xo‘jaligi sohasida axborot almashish, suv resurslarini boshqarish bo‘yicha hamkorlikni kuchaytirish va o‘zaro manfaatli loyihalarni rivojlantirishga kelishib olgan.

 

Mutaxassislar fikricha, bitim transchegaraviy suv resurslaridan samarali foydalanish, suv tanqisligi bilan bog‘liq xavflarni kamaytirish, ehtimoliy kelishmovchiliklarning oldini olish hamda mintaqaviy suv hamkorligini mustahkamlash uchun muhim huquqiy asos bo‘lib xizmat qiladi.

 

Ma’lumot uchun, O‘zbekiston va Qozog‘iston Sirdaryo havzasidagi transchegaraviy suv resurslaridan birgalikda foydalanadi. Ushbu suvlar har ikki mamlakatda qishloq xo‘jaligini sug‘orish, aholini ichimlik suvi bilan ta’minlash, elektr energiyasi ishlab chiqarish va ekologik barqarorlikni saqlashda muhim ahamiyat kasb etadi.

 

Eslatib o‘tamiz, mazkur bitim O‘zbekiston tomonidan 2026-yil 6-martdagi Prezidentning PQ-88-son qarori bilan tasdiqlangan edi.