Qashqadaryoda ikki bor qo‘lga tushgan eshak go‘shti savdogari 4,5 yilga qamaldi
Sudlanuvchining xonadonidan ikki marotaba yuzlab kilogramm iste’molga yaroqsiz go‘sht va eshak terilari aniqlangan.
Qashqadaryo viloyatida o‘z xonadonida eshak so‘yib, go‘shtini sotish bilan shug‘ullangan erkakka 4,5 yil muddatga ozodlikdan mahrum qilish jazosi tayinlandi.
Kun.uz ma'lumotlariga ko‘ra, 44 yoshli fuqaro I. X. qisqa muddat ichida mazkur qilmishi uchun ikki marotaba sudlangan.
Dastlab, 2025-yil 22-oktabr kuni o‘tkazilgan tezkor tadbir davomida uning yashash xonadonidan 61 kilogramm iste’molga yaroqsiz go‘sht, 112 dona eshak terisi hamda 15 dona eshak qovurg‘asi aniqlangan. Ushbu holat yuzasidan Jinoyat ishlari bo‘yicha Kasbi tuman sudi tomonidan unga 2 yil ozodlikni cheklash jazosi tayinlangan.
Shunga qaramay, 2025-yil 28-dekabr kuni o‘tkazilgan navbatdagi tezkor tadbirda uning xonadonidan 247 kilogramm iste’molga yaroqsiz go‘sht, eshak suyaklari va 99 dona eshak terisi topilgan. Ushbu ish bo‘yicha Qarshi tuman sudi 2026-yil 13-maydagi hukmi bilan yana ozodlikni cheklash jazosi tayinlagan.
Mazkur hukm yuzasidan Qashqadaryo viloyati prokurori birinchi o‘rinbosari tomonidan protest kiritilib, tayinlangan jazo haddan tashqari yengil ekani ta’kidlangan.
Natijada Qashqadaryo viloyat sudi jinoyat ishlari bo‘yicha sudlov hay’ati kassatsiya instansiyasi dastlabki hukmni bekor qilib, yangi hukm chiqardi.
Sud qaroriga ko‘ra, I. X. Jinoyat kodeksining 186-moddasi 2-qismi "v" bandi bilan aybli deb topilib, 4 yil ozodlikdan mahrum qilish jazosiga hukm qilindi. Avvalgi hukm bilan tayinlangan jazo qisman qo‘shilib, unga yakuniy 4 yil 6 oy ozodlikdan mahrum qilish jazosi belgilangan.
Mahkum jazoni qattiq tartibli koloniyada o‘tashi belgilandi va u sud zalining o‘zida qamoqqa olingan.
