Toshkentda Tracker 6 yoshli bolani bosib ketdi
Bola olgan og‘ir tan jarohatlari sabab voqea joyida vafot etgan.
Toshkent shahrining Mirzo Ulug‘bek tumanida Tracker rusumli avtomobil ishtirokida sodir bo‘lgan yo‘l-transport hodisasi oqibatida 6 yoshli bola halok bo‘ldi.
“Millar”ning ma’lum qilishicha, hodisa joriy yilning 1-iyul kuni Cho‘ldaraxt ko‘chasida yuz bergan. Harakatlanib ketayotgan Tracker rusumli avtomobil yo‘lga to‘satdan yugurib chiqqan 6 yoshli bolani bosib ketgan.
Kuzatuv kameralari tasvirlariga ko‘ra, bola yo‘l chetida to‘xtab turgan Cobalt avtomobili ortidan yugurib chiqqan va Tracker uni old hamda orqa g‘ildiraklari bilan bosib o‘tgan. Oqibatda bola olgan og‘ir tan jarohatlari sabab voqea joyida vafot etgan.
Mahalliy aholi mazkur hududda bolalar maydonchasi yo‘qligi sababli bolalar ko‘chada o‘ynashga majbur bo‘layotganini bildirgan. Ayrim guvohlarning ta’kidlashicha, avtomobilni boshqargan haydovchi ayol hodisa sodir bo‘lgan paytda tormoz bermagan.
Mazkur holat yuzasidan Toshkent shahar IIBB huzuridagi Tergov boshqarmasi tomonidan Jinoyat kodeksining 266-moddasi 2-qismi (transport vositalari harakati yoki ulardan foydalanish xavfsizligi qoidalarini buzish, odam o‘limiga sabab bo‘lishi) bilan jinoyat ishi qo‘zg‘atilgan.
Hozirda hodisa yuzasidan tergov harakatlari davom ettirilmoqda.
