Xitoyda “Bavi” to‘foni xavfi sabab 600 mingdan ortiq aholi evakuatsiya qilindi
Filippinda to‘fon natijasida 17 kishi halok bo‘ldi.
Yaponiyaning Sakishima orollariga zarba bergan va Tayvanning shimoliy qismini chetlab o‘tgan "Bavi" to‘foni Xitoy tomon harakatlanmoqda. Tabiiy ofat xavfi tufayli mamlakatning sharqiy hududlaridan 600 mingdan ortiq aholi evakuatsiya qilindi. Bu haqda Al Jazeera xabar berdi.
Xitoy rasmiylari ma’lumotiga ko‘ra, Chjeszyan provinsiyasidan 500 mingdan ortiq, qo‘shni Futszyan provinsiyasidan esa 100 mingga yaqin kishi xavfsiz hududlarga ko‘chirildi.
Sinoptiklar prognoziga ko‘ra, tayfun 13-iyulga o‘tar kechasi Chjeszyan provinsiyasining Venchjou shahriga yetib borishi va kuchli yomg‘ir hamda shamol olib kelishi kutilmoqda. Meteorologlarning ta’kidlashicha, "Bavi" avvalgi kuchini ancha yo‘qotgan bo‘lsa-da, tarkibidagi katta miqdordagi namlik sababli hamon jiddiy xavf tug‘dirmoqda.
Xitoy milliy meteorologiya xizmati tayfun bo‘yicha ikkinchi eng yuqori — to‘q sariq darajadagi ogohlantirishni e’lon qildi. Yuzlab aviareyslar bekor qilindi, temiryo‘l qatnovi qisqartirildi, maktablar va paromlar faoliyati vaqtincha to‘xtatildi.
Futszyan provinsiyasining Ninde shahrida 3,7 mingdan ortiq aholi xavfli hududlardan evakuatsiya qilingan, 17 mingdan ziyod qutqaruvchi favqulodda vaziyatlarga tayyor holatga keltirilgan.
Ayni paytda Xitoy janubidagi Xaynan va Guansi hududlari hafta boshida kuzatilgan "Maysak" tropik bo‘roni oqibatlarini bartaraf etishda davom etmoqda. Nannin shahrida to‘g‘on buzilishi oqibatida yuzaga kelgan toshqinlarda kamida 39 kishi halok bo‘lgan.
"Bavi" tayfuni qo‘shni davlatlarda ham talafotlar keltirib chiqardi. Filippinda kuchli yomg‘ir va ko‘chkilar oqibatida kamida 17 kishi halok bo‘ldi. Tayvanda 36 kishi jarohat oldi, 14 ming 210 kishi evakuatsiya qilindi. Yaponiyaning Okinava prefekturasida esa 200 dan ortiq aviareys bekor qilinib, aholi kuchli shamol, baland to‘lqin va suv sathining ko‘tarilishi xavfi haqida ogohlantirildi.
