O‘zbekistonda Jahon Islom sivilizatsiyasi alyansi tuziladi

Toshkent shahrida o‘tkazilgan I Xalqaro islom sivilizatsiyasi forumi yakunida 10 ta muhim tashabbusni o‘z ichiga olgan Deklaratsiya bir ovozdan qabul qilindi. Bu haqda Din ishlari bo‘yicha qo‘mita matbuot xizmati xabar berdi.

 

Hujjatga muvofiq, O‘zbekistondagi Islom sivilizatsiyasi markazi negizida Jahon Islom sivilizatsiyasi alyansini tashkil etish tashabbusi ham qo‘llab-quvvatlandi.

 

Ma’lum qilinishicha, forumda 40 dan ortiq davlatdan 300 ga yaqin xorijiy ishtirokchi qatnashgan. Ular Deklaratsiyada nazarda tutilgan mazkur tashabbusni bir ovozdan ma’qullagan.

 

Qayd etilishicha, Jahon Islom sivilizatsiyasi alyansi tarkibiga xalqaro tashkilotlar, ilmiy va ta’lim muassasalari, fanlar akademiyalari, muzeylar, kutubxonalar, arxivlar, islom qo‘lyozmalari markazlari, tadqiqot institutlari hamda boshqa ixtisoslashgan tashkilotlar birlashtiriladi.

 

Alyansning asosiy maqsadi uzoq muddatli xalqaro hamkorlikni rivojlantirish, qo‘shma ilmiy, ta’limiy, madaniy, muzey va raqamli loyihalarni amalga oshirish, bilim va ilg‘or tajriba almashinuvini rag‘batlantirish, shuningdek, islom sivilizatsiyasining jahon madaniy va intellektual merosidagi o‘rnini asrash, ilmiy o‘rganish va keng targ‘ib etishga qaratilgan sa’y-harakatlarni birlashtirishdan iborat.

 

Islom sivilizatsiyasi merosini o‘rganish, asrash va ommalashtirish, ilm-fan, ta’lim, madaniyatlararo muloqot va gumanitar hamkorlikni rivojlantirishga qo‘shilgan ulkan hissani munosib taqdirlash maqsadida xalqaro mukofot ta’sis etiladi.

 

Ma’lumot uchun, Prezident Shavkat Mirziyoyev tashabbusi bilan tashkil etilgan “Tinchlik, bag‘rikenglik va ma’rifat yo‘li” mavzusidagi I Xalqaro islom sivilizatsiyasi forumi 7-iyul kuni o‘z ishini boshlagan. Forum Toshkent, Samarqand va Termiz shaharlarida o‘tkazilib, uning dasturidan 11 ta yalpi majlis va 4 ta xalqaro konferensiya o‘rin olgan.