O‘zbekistonda jarima ballari 12 balldan yuqori haydovchilar soni 671 nafarga yetdi
Yo‘l harakati qoidalarini buzgan qariyb 400 ming haydovchiga ma’muriy ogohlantirish qo‘llanilgan.
YHXX axborot xizmati ma’lumotlariga ko‘ra, bugungi kunga qadar 671 nafar haydovchi 12 balldan yuqori jarima ballini to‘plagan. Amaldagi tartibga ko‘ra, jarima ballari 12 balldan oshgan haydovchi transport vositasini boshqarish huquqidan kamida olti oy muddatga mahrum etiladi.
Ma’lum qilinishicha, ma’muriy ogohlantirish transport vositasidan foydalanish qoidalarini buzish, avtomobilni boshqarish vaqtida telefondan foydalanish, haydash chog‘ida monitor yoki displey orqali teledasturlarni tomosha qilish, to‘xtash va to‘xtab turish qoidalarini buzish, majburiy sug‘urta to‘g‘risidagi qonunchilik talablariga rioya qilmaslik, shuningdek, piyodalar va yo‘l harakatining boshqa ishtirokchilari tomonidan yo‘l harakati qoidalarini buzish holatlarida qo‘llaniladi.
Qayd etilishicha, ma’muriy ogohlantirish ayni bir shaxsga nisbatan bir yil davomida faqat bir marta berilishi mumkin.
