Qatarning sobiq amiri Shayx Hamad bin Xalifa Ol Soniy vafot etdi
Mamlakatda to‘rt kunlik motam e’lon qilindi. Bir necha davlatlar yetakchilari Shayx Hamadning vafoti munosabati bilan ta’ziya bildirdi.
Qatarning sobiq amiri, mamlakatning zamonaviy taraqqiyotiga asos solgan siyosatchilardan biri Shayx Hamad bin Xalifa Ol Soniy 74 yoshida vafot etdi, deya xabar bermoqda Al Jazeera.
Ma’lum qilinishicha, sobiq amir 12-iyul tongida hayotdan ko‘z yumgan. Uning vafoti munosabati bilan Qatarda 4 kunlik umumxalq motami 13-iyuldan boshlanadi. Shu davrda davlat idoralari va jamoat tashkilotlari faoliyati to‘xtatiladi, davlat bayroqlari yarim ustunga tushiriladi.
Shayx Hamad 1995-yildan 2013-yilgacha Qatarni boshqargan. Uning rahbarligi davrida mamlakat iqtisodiy, ijtimoiy va madaniy jihatdan jadal rivojlanib, dunyodagi eng yirik suyultirilgan tabiiy gaz eksportchisiga aylandi. Shuningdek, Qatar xalqaro maydondagi siyosiy va iqtisodiy ta’sirini sezilarli darajada kuchaytirdi.
Uning hukmronligi davrida 1996-yilda Al Jazeera axborot tarmog‘i tashkil etildi, 2004-yilda esa mamlakatning birinchi doimiy Konstitutsiyasi qabul qilindi. Shu davrda mahalliy saylovlar joriy etilib, ayollarga ovoz berish va nomzod sifatida qatnashish huquqi berildi.
2013-yilda Shayx Hamad hokimiyatni o‘g‘li Shayx Tamim bin Hamad Ol Soniyga topshirgan edi. Bu Fors ko‘rfazi arab monarxiyalari tarixida kam uchraydigan ixtiyoriy taxtni topshirish holatlaridan biri sifatida baholangan.
Sobiq amirning vafoti munosabati bilan Misr prezidenti Abdulfattoh as-Sisiy, Pokiston prezidenti Osif Ali Zardoriy hamda BAA prezidenti Shayx Muhammad bin Zoid Ol Nahayon hamdardlik bildirib, uning Qatar taraqqiyoti va mintaqaviy hamkorlikni mustahkamlashdagi xizmatlarini e’tirof etdi.
