Qoraqalpog‘istonda issiq sabab bog‘chalar vaqtincha yopiladi
Cheklovlar 13-iyuldan boshlanib, hududlarga qarab 15–18-iyulgacha amal qiladi.
Qoraqalpog‘iston Respublikasining ayrim hududlarida havo haroratining keskin ko‘tarilishi munosabati bilan davlat va nodavlat maktabgacha ta’lim tashkilotlari faoliyati vaqtincha to‘xtatiladi. Bu haqda Qoraqalpog‘iston Respublikasi Maktabgacha va maktab ta’limi vazirligi ma’lum qildi.
Qayd etilishicha, shahar va tuman hokimlarining qarorlariga asosan:
- Nukus shahridagi bog‘chalar 13–18-iyul kunlari;
- Amudaryo tumanida 13–15-iyul;
- Beruniy tumanida 13–17-iyul;
- Xo‘jayli tumanida 13–18-iyul;
- Taxiatosh, Shumanay, Mo‘ynoq, Qonliko‘l va To‘rtko‘l tumanlarida esa 13–17-iyul kunlari faoliyatini vaqtincha to‘xtatadi.
Vazirlikka ko‘ra, mazkur qaror bolalarning sog‘lig‘ini jazirama issiqning salbiy ta’siridan himoya qilish hamda ularning xavfsizligini ta’minlash maqsadida qabul qilingan. Faoliyatni vaqtincha to‘xtatish Sanitariya-epidemiologik osoyishtalik va jamoat salomatligi bo‘limlarining tegishli xulosalari hamda tavsiyalariga muvofiq amalga oshiriladi.
Shuningdek, ota-onalarga farzandlari salomatligiga alohida e’tibor qaratish, kunning eng issiq vaqtlarida ularning ochiq havoda uzoq vaqt bo‘lishiga yo‘l qo‘ymaslik va zarur ehtiyot choralariga rioya qilish tavsiya etildi.
