Bangkokdagi barda yuz bergan yong‘in oqibatida 27 kishi halok bo‘ldi
60 dan ortiq kishi jarohatlangan, ayrim shaxslar bedarak yo‘qolgan.
Tailand poytaxti Bangkokning Chatuchak tumanidagi barda yuz bergan yong‘in oqibatida kamida 27 kishi halok bo‘ldi, 60 dan ortiq kishi jarohatlandi. Bu haqda BBC xabar berdi.
Tailand rasmiylari ma’lumotiga ko‘ra, halok bo‘lganlar orasida 9 nafar erkak va 18 nafar ayol bor. Jarohatlanganlar shifoxonalarga yetkazilgan bo‘lib, ularning 8 nafari og‘ir ahvolda ekani ma’lum qilingan. Shuningdek, ayrim shaxslar bedarak yo‘qolgani ham xabar qilinmoqda.
Dastlabki ma’lumotlarga ko‘ra, yong‘in elektr taqsimlash paneli yaqinida boshlangan. Tailand Bosh vaziri Anuthin Chanvirakunning aytishicha, voqea joyida bo‘lgan musiqachi olov juda qisqa vaqt ichida butun binoni qamrab olganini bildirgan.
Bosh vazirning so‘zlariga ko‘ra, ko‘plab odamlar binoning orqa qismida bo‘lgani sababli tashqariga chiqishga ulgurmagan. Ayrimlari olov va tutundan qochib, hojatxonaga yashiringan, qutqaruvchilar esa qurbonlarning aksariyatini aynan shu yerdan topgan.
O‘t o‘chiruvchilar yong‘inni taxminan 30 daqiqa ichida to‘liq nazorat ostiga olgan.
Voqea joyidan olingan tasvirlarda bino ichki qismi deyarli to‘liq yonib ketgani, devor va mebellar kuyib kul bo‘lgani hamda shiftning bir qismi qulab tushgani aks etgan.
Bangkok gubernatori Chadchart Sittipunt yong‘in tez tarqalishiga bino ichidagi yonuvchan materiallar sabab bo‘lganini ta’kidlagan.
Hozirda yong‘in sabablari yuzasidan rasmiy tergov harakatlari olib borilmoqda.
