Ekologiya qo‘mitasi anomal issiq kunlari munosabati bilan ogohlantirish bilan chiqdi

 

Ekologiya va iqlim o‘zgarishi milliy qo‘mitasi 13–17-iyul kunlari respublika hududida kuzatilishi kutilayotgan anomal issiq munosabati bilan fuqarolar va mas’ul tashkilotlarni ehtiyot choralariga qat’iy amal qilishga chaqirdi.

 

Ekologiya va iqlim o'zgarishi qo‘mitasi ma’lumotiga ko‘ra, ushbu kunlarda janubdan kirib keladigan o‘ta issiq havo oqimlari sabab ayrim hududlarda havo harorati 44–46 darajagacha ko‘tarilishi prognoz qilinmoqda.

 

Qayd etilishicha, jazirama nafaqat insonlar salomatligi, balki daraxtlar, butalar, yashil hududlar va hayvonot dunyosiga ham jiddiy xavf tug‘diradi. Yuqori harorat va suv tanqisligi daraxtlarning qurishi, yashil maydonlarning zararlanishi hamda ekologik barqarorlikka salbiy ta’sir ko‘rsatishi mumkin.

 

Shu munosabat bilan fuqarolarga kunning eng issiq vaqti — soat 11:00 dan 17:00 gacha imkon qadar ochiq havoda bo‘lmaslik, ko‘proq suyuqlik iste’mol qilish, bolalar va keksalarga alohida e’tibor qaratish tavsiya etilgan.

 

Bundan tashqari, xonadon va mahallalardagi daraxt hamda butalarni erta tong yoki kechki payt muntazam sug‘orish, tuproq namligini saqlash, yong‘in xavfsizligi qoidalariga qat’iy rioya qilish hamda yashil hududlarga zarar yetkazishi mumkin bo‘lgan harakatlardan tiyilish so‘ralgan.

 

Mahalliy hokimliklar, kommunal xizmatlar va boshqa mas’ul tashkilotlarga esa yashil hududlarni doimiy monitoring qilish, daraxtlarni agrotexnik talablar asosida sug‘orish, sug‘orish infratuzilmasining uzluksiz ishlashini ta’minlash, suvni tejovchi texnologiyalarni keng joriy etish hamda tabiiy hududlarda yong‘inlarning oldini olish choralarini kuchaytirish tavsiya etilgan.

 

Ekologiya va iqlim o‘zgarishi milliy qo‘mitasi har bir saqlab qolingan daraxt issiqlik ta’sirini kamaytirish, havo sifatini yaxshilash va ekologik muvozanatni ta’minlashda muhim ahamiyat kasb etishini ta’kidlab, aholini tabiatga ehtiyotkorona munosabatda bo‘lishga chaqirgan.