Tojikistondan yiliga 700 ming tonna temir xomashyosi olib kelinadi
Shavkat Mirziyoyev metallurgiya sanoatining xomashyo bazasini kengaytirish bo‘yicha topshiriqlar berdi.
Shavkat Mirziyoyev raisligida qora metallurgiya sanoatini yangi bosqichga olib chiqish bo‘yicha ustuvor vazifalar yuzasidan o‘tayotgan yig‘ilishda mamlakatda mavjud 1,5 milliard tonna temir ruda zaxirasidan samarali foydalanish masalalari muhokama qilindi.
Qayd etilishicha, “Surun-ota” konidan yiliga 650 ming tonna temir xomashyosi olish bo‘yicha xitoylik hamkorlar bilan kelishuvga erishilgan. Ushbu kondan temir konsentrati 2027-yildan boshlab Bekobod metallurgiya kombinatiga yetkazib beriladi.
Shuningdek, “Tebinbuloq” konini uch-to‘rt yil ichida ishga tushirish orqali yiliga 1 million tonna po‘lat ishlab chiqarish imkoniyati yaratiladi.
Yig‘ilishda Tojikistondan yiliga 700 ming tonna temir xomashyosini sotib olish bo‘yicha memorandum imzolangani qayd etilib, tez fursatda shartnomani rasmiylashtirish va kelgusi yildan xomashyo olib kelishni boshlash vazifasi qo‘yildi.
Shuningdek, yirik xususiy korxonalar geologiya-qidiruv ishlari va konlarni o‘zlashtirishga tayyor ekani qayd etildi. Samarqanddagi korxona temir koni ajratilsa, 500 million dollargacha investitsiya kiritishga tayyorligini bildirgan. Bekobod metallurgiya kombinati esa Forishdagi 32 million tonna temir resursiga ega “Temirkon” konini o‘zlashtirishni taklif qildi.
Prezident ushbu loyihalarni amalga oshirish uchun zarur sharoitlarni yaratish yuzasidan mutasaddilarga tegishli topshiriqlar berdi.
