Toshkent metropoliteniga yana 3 ta zamonaviy metro poyezdi olib kelindi
Yil oxirigacha Toshkent metropoliteniga yana 11 ta yangi poyezd olib kelish rejalashtirilgan.
Toshkent metropoliteniga yana 3 ta zamonaviy to‘rt vagonli harakat tarkibi olib kelindi. Bu haqda Metropoliten matbuot xizmati ma’lum qildi.
Qayd etilishicha, mamlakatda jamoat transporti tizimini rivojlantirish, yo‘lovchilarga ko‘rsatilayotgan xizmatlar sifatini oshirish hamda zamonaviy va qulay transport infratuzilmasini yaratish bo‘yicha izchil ishlar davom ettirilmoqda. Shu maqsadda Toshkent metropolitenining moddiy-texnik bazasi bosqichma-bosqich yangilanmoqda.
Yo‘lovchilarning talab va takliflarini inobatga olgan holda olib kelingan 3 ta zamonaviy to‘rt vagonli yangi poyezdlar yoz mavsumida samarali sovutish, qish mavsumida esa isitish tizimi bilan jihozlangan bo‘lib, yo‘lovchilar uchun yanada qulay safar sharoitini ta’minlaydi.
Yangi harakat tarkiblarining foydalanishga topshirilishi metro poyezdlari harakati intervalini qisqartirish, yo‘lovchilarga ko‘rsatilayotgan xizmat sifatini yaxshilash hamda ekspluatatsiya muddati uzoq bo‘lgan eski turdagi poyezdlarni bosqichma-bosqich zamonaviy tarkiblar bilan almashtirish imkonini beradi.
Shuningdek, zamonaviy poyezdlar sonining ko‘payishi metropolitenning tashish quvvatini oshirish, harakat jadvalining barqarorligini ta’minlash va kun sayin ortib borayotgan yo‘lovchilar oqimiga sifatli xizmat ko‘rsatishda muhim ahamiyat kasb etadi.
Ma’lum qilinishicha, joriy yil yakuniga qadar Toshkent metropoliteniga yana 11 ta zamonaviy harakat tarkibini olib kelish rejalashtirilgan.
