Toshkent viloyati, Samarqand va Surxondaryoda ham temir zaxiralari borligi prognoz qilinmoqda

 

Shavkat Mirziyoyev raisligida qora metallurgiya sanoatini yangi bosqichga olib chiqish bo‘yicha ustuvor vazifalar yuzasidan o‘tayotgan yig‘ilishda qora metallurgiya sanoatining xomashyo bazasini kengaytirish va xususiy sektorni qo‘llab-quvvatlash masalalari muhokama qilindi.

Qayd etilishicha, Toshkent viloyati, Samarqand va Surxondaryo hududlarida ham temir rudasi zaxiralari mavjud bo‘lishi prognoz qilinmoqda.

Davlat rahbari bunday yirik metallurgiya loyihalarini amalga oshirishda temir sifati va mahsulot raqobatbardoshligini oshirish uchun marganes hamda ferrosilitsiy kabi xomashyoga ehtiyoj ortishini ta’kidladi.

Shu munosabat bilan mutasaddilarga ushbu maydonlarni sun’iy intellekt yordamida tahlil qilib, bir oyda temir va uni boyitishga zarur minerallar zaxirasini ko‘paytirish bo‘yicha geologiya dasturini kiritish topshirildi.

 

Hududlar rahbarlariga esa ushbu loyihalarni amalga oshirishga yirik tadbirkorlarni keng jalb etish vazifasi yuklatildi.

Yig‘ilishda metallurgiya sohasida bugungi kunda 150 ga yaqin o‘rta va kichik xususiy korxona faoliyat yuritayotgani qayd etildi. Qurilish materiallari sohasiga bag‘ishlangan yig‘ilishdan so‘ng hududlarda metall mahsulotlari ishlab chiqarish bo‘yicha qator yangi loyihalar boshlanganiga alohida e’tibor qaratildi.

Xususiy korxonalarni xomashyo bilan uzluksiz va barqaror ta’minlash maqsadida import xomashyosini markazlashgan tartibda xarid qiluvchi alohida kompaniya tashkil etilishi belgilandi.

Mazkur kompaniya faoliyatini yo‘lga qo‘yish uchun 200 million dollar mablag‘ ajratiladi. Shuningdek, import qilinadigan metallurgiya xomashyosi faqat birja savdolari orqali realizatsiya qilinishi belgilandi.