Toshkentda pulli avtoturargoh uchun to‘lov qilmagan haydovchilarni jarimaga tortish taklif etildi
Bunday qoidabuzarlik uchun BHMning ikki baravari miqdorida jarima belgilanishi mumkin.
Toshkent shahar hokimligi yo‘l bo‘yidagi pulli avtoturargohlardan foydalanganlik uchun to‘lovni o‘z vaqtida amalga oshirmagan yoki undan bo‘yin tovlagan haydovchilarga nisbatan ma’muriy javobgarlik joriy etishni nazarda tutuvchi qonun loyihasini jamoatchilik muhokamasiga qo‘ydi.
Loyihaga ko‘ra, Ma’muriy javobgarlik to‘g‘risidagi kodeks yangi 128¹¹-modda bilan to‘ldiriladi. Unga muvofiq, yo‘l bo‘yidagi pulli avtoturargohdan foydalanganlik uchun to‘lovni belgilangan muddatda amalga oshirmaslik yoki to‘lovdan bo‘yin tovlash bazaviy hisoblash miqdorining (BHM) ikki baravari miqdorida jarimaga sabab bo‘ladi.
O‘zbekistonda 2026-yil 1-sentyabrdan BHM 440 ming so‘m etib belgilanadi. Shundan kelib chiqib, mazkur huquqbuzarlik uchun jarima miqdori 880 ming so‘mni tashkil etadi.
Qonun loyihasida bunday huquqbuzarliklarni maxsus avtomatlashtirilgan foto va video qayd etish vositalari hamda axborot tizimlari orqali aniqlash nazarda tutilgan. Shu bilan birga, qonunchilikka muvofiq pulli avtoturargohlardan bepul yoki imtiyozli foydalanish huquqiga ega shaxslarga ushbu javobgarlik tatbiq etilmaydi.
Loyiha izohida qayd etilishicha, mazkur tashabbus yo‘l infratuzilmasini rivojlantirish, tirbandliklarni kamaytirish hamda pulli avtoturargohlardan foydalanish qoidalariga rioya etilishini ta’minlash maqsadida ishlab chiqilgan.
Ma’lumot uchun, Toshkent shahridagi yo‘l bo‘yidagi pulli avtoturargohlar Poytaxt Parking operatori tomonidan tashkil etiladi. “Streetpark Systems” MCHJ esa umumiy foydalanishdagi avtomobil yo‘llarida joylashgan pulli to‘xtab turish joylaridan foydalanish xizmatlarini ko‘rsatish bo‘yicha ustun muzokara huquqiga ega operator sifatida belgilangan.
