Xitoyga qaramlikni kamaytirish G‘arbga 23,6 trillion dollarga tushishi mumkin
Arzon Xitoy tovarlarini mahalliy tovarlar bilan almashtirish inflyatsiyani tezlashtirishi mumkin.
AQSH va Yevropaning muhim texnologik hamda ishlab chiqarish tarmoqlarida Xitoyga qaramlikni kamaytirishi kelgusi 25 yil ichida 23,6 trillion dollar miqdorida qo‘shimcha investitsiyalarni talab qiladi. Bu haqda Financial Times nashriga tayanib, Point.md xabar berdi.
Hisob-kitoblarga ko‘ra, 2050-yilgacha AQSHga 13,7 trillion dollar, yevro hududiga 9,1 trillion dollar, Buyuk Britaniyaga esa 800 milliard dollar investitsiya zarur bo‘ladi. Mutaxassislarning ta’kidlashicha, Yevropa Ittifoqi uchun bu deyarli yillik byudjetni ikki baravar oshirish bilan teng.
Hisobot mualliflari Xitoy mahsulotlaridan to‘liq voz kechish amalda imkonsizligini qayd etgan. Bunga Xitoyning litiy va kobaltning 60 foizdan ortig‘i, shuningdek, grafit hamda nodir yer metallarining qariyb 80 foizi yetkazib berilishini nazorat qilayotgani sabab sifatida ko‘rsatilgan.
Shuningdek, Xitoy mahsulotlari ko‘plab mahalliy muqobillarga nisbatan sezilarli darajada arzon ekani, ularni almashtirish esa inflyatsiyani tezlashtirishi mumkinligi ta’kidlangan. Hisobotga ko‘ra, Yevropada ayrim strategik tarmoqlarda narxlar 1–2,5 foizga oshishi ehtimoli bor.
Ekspertlar eng maqbul yechim sifatida “qisman ajralish” strategiyasini taklif qilmoqda. Unga ko‘ra, eng zaif ta’minot zanjirlarini mustahkamlash uchun tanlab investitsiya kiritish orqali davlat va biznes zimmasiga tushadigan moliyaviy yukni kamaytirish mumkin.
