“Bu piar ham, bolalarni siyosatga jalb qilish ham emas” — Sadir Japarov qizi haqidagi bahslarga munosabat bildirdi

 

Qirg‘iziston prezidenti Sadir Japarov qizi Janayimning bolalar reabilitatsiya markaziga tashrifi ortidan ijtimoiy tarmoqlarda tarqalgan muhokamalarga munosabat bildirdi. Bu haqda “AKIpress” xabar berdi.

 

Prezidentning so‘zlariga ko‘ra, qizining “Oltin bolalik” markazida bolalarga sovg‘alar ulashgani aks etgan video siyosiy maqsad yoki piar bilan bog‘liq emas.

 

“Farzandlarim yoki yaqinlarimning siyosat va davlat ishlariga aralashishiga hech qachon yo‘l qo‘ymayman. Agar shunday bo‘lganida, bu allaqachon barchaga ma’lum bo‘lardi”, — degan Sadir Japarov.

 

Uning ta’kidlashicha, “Oltin bolalik” bolalar reabilitatsiya markazi uning topshirig‘i bilan qurilishi yakunlangan bo‘lib, bu yerda har yili mamlakatning turli hududlaridan kelgan, ayniqsa kam ta’minlangan oilalar farzandlari dam oladi. Odatda bolalarga sovg‘alarni birinchi xonim Aygul Japarova topshiradi.

 

Prezidentning ma’lum qilishicha, tadbir kuni u rafiqasi bilan boshqa tadbirda bo‘lgani sababli Aygul Japarova qizi Janayimdan bolalarni xafa qilmaslik uchun markazga borib, sovg‘alarni topshirishni so‘ragan. Janayim bolalar uchun tayyorlangan sport kiyimlarini tarqatishda yordam bergan va tadbirdan so‘ng darhol markazni tark etgan.

 

Japarovning qayd etishicha, tadbirga ommaviy axborot vositalari taklif qilinmagan va uni ommaga namoyish etish rejalashtirilmagan. Video esa tadbir ishtirokchilaridan biri tomonidan mobil telefonda tasvirga olinib, ijtimoiy tarmoqlarga joylashtirilgan.

 

Prezident ushbu holatga siyosiy mazmun yuklash uchun asos yo‘qligini ta’kidlagan.